Rastet e dhunës në familje sa vijnë e shtohen çdo ditë e më shumë në vendin tonë. Zakonisht viktima janë gratë të cilat përjetojnë dhunë psikike e fizike kryesisht nga familjarët e tyre, të cilët pa hezitim i rrahin ato.

Për një rast të tillë që dyshohet të ketë ndodhur në Malishevë, Prokuroria ka nisur hetimet.

Burimet e Gazetës Sinjali brenda Prokurorisë kanë bërë me dije se viktimë në këtë rast është një vajzë 26-vjeçare e cila jeton në bashkësi familjare me xhaxhain e saj dhe fëmijët e tij.

Dy djemtë e xhaxhait dyshohet se kanë ushtruar dhunë psikike e fizike ndaj viktimës, duke e rrahur brutalisht dhe duke i shkaktuar asaj lëndime trupore. Si pasojë e dhunës, ajo ka marrë lëndime trupore dhe për këtë ka kërkuar ndihmë mjekësore në Qendrën Kryesore të Mjekësisë Familjare në Malishevë.

Ndërkohë ka dhënë dëshminë e saj para organeve të hetuesisë, teksa ka shprehur dëshirën që të dërgohet në strehimore, pasi që nuk ndihet e sigurt të vazhdojë të jetojë në shtëpinë e njëjtë me të dyshuarit.

Njëri prej të dyshuarve është intervistuar në stacion policor dhe me urdhër të prokurorit është dërguar në mbajtje.

Me urdhër të prokurorit, rasti është cilësuar ‘Dhunë në familje’.