Kampioni i Shqipërisë, Egnatia, ka marrë një rezultat pozitiv në ndeshjen e parë të kualifikimeve për Champions League, duke barazuar 1:1 në udhëtim ndaj skuadrës moldave Petrocub.

Ndeshja e zhvilluar në Moldavi ka nisur në mënyrën më të keqe për ekipin shqiptar, pasi vendasit kanë kaluar në epërsi që në minutën e parë. Një gabim i mbrojtjes së Egnatias i ka dhënë mundësinë Petru Popescut të shënojë për 1:0.

Megjithatë, skuadra nga Rrogozhina ka reaguar shpejt dhe ka arritur ta barazojë rezultatin në minutën e tridhjetë e pestë. Altin Kryeziu ka realizuar një gol të bukur pas një aksioni të mirë të ndërtuar nga Egnatia, me asistimin e Guillem Jaime.

Pjesa e parë është mbyllur me një moment të vështirë për kampionin shqiptar. Në minutat shtesë, pas ndërhyrjes së VAR-it, gjyqtari ka vendosur ta ndëshkojë me karton të kuq direkt Albano Aleksin, duke lënë Egnatian me një lojtar më pak.

Në pjesën e dytë, Petrocub ka kërkuar golin e fitores dhe ka krijuar disa raste të mira, por portieri i Egnatias, Mario Dajsinani, ka qenë në nivel të lartë. Ai ka bërë disa pritje të rëndësishme duke e mbajtur rezultatin të pandryshuar.

Me këtë barazim, Egnatia ruan shpresat për kualifikim dhe do ta kërkojë kalimin në raundin tjetër në ndeshjen e kthimit.