Barcelona ka marrë një fitore shumë të madhe në garën për titull, duke e mposhtur Atletico Madrid me rezultat 2:1 në kryeqytetin spanjoll.

Hero i ndeshjes ka qenë Robert Lewandowski, i cili ka realizuar golin e fitores në minutën e tetëdhjetë e shtatë, duke i dhënë ekipit të tij një epërsi prej shtatë pikësh në krye të tabelës.

Barcelona ka hyrë në këtë ndeshje me motiv shtesë, pasi rivali për titull, Real Madrid, kishte pësuar humbje ndaj Mallorca më herët gjatë ditës.

Ndeshja ka nisur me ritëm të lartë nga të dy skuadrat. Antoine Griezmann ka rrezikuar për vendasit, ndërsa te Barcelona, rasti më i mirë në fillim i ka takuar Fermín Lopez pas një asistimi të nga Lamine Yamal.

Atletico ka kaluar në epërsi me golin e Giuliano Simeone, por reagimi i Barcelonës ka qenë i shpejtë. Vetëm tri minuta më vonë, Marcus Rashford e ka barazuar rezultatin pas një bashkëpunimi të mirë me Dani Olmo.

Para përfundimit të pjesës së parë, ndeshja ka marrë kthesë të madhe kur Nicolas Gonzalez është përjashtuar me karton të kuq, duke lënë Atletico Madrid me një lojtar më pak.

Në pjesën e dytë, Barcelona ka dominuar dhe ka krijuar disa raste të mira, por portieri Juan Musso ka bërë disa pritje vendimtare.

Trajneri Hansi Flick ka vendosur ta fusë në lojë Lewandowskin nga banka rezervë, dhe ky vendim ka rezultuar vendimtar. Në minutën e tetëdhjetë e shtatë, sulmuesi polak e ka shfrytëzuar një top të kthyer në zonë dhe e ka dërguar në rrjetë për 2:1.

Me këtë fitore, Barcelona vazhdon serinë pozitive dhe forcon pozitat në krye të LaLiga, ndërsa tashmë përgatitet për një përballje të madhe në çerekfinale të Champions League kundër skuadrës së drejtuar nga Diego Simeone.