Skitari zviceran Franjo von Allmen ka fituar medaljen e dytë të artë brenda 48 orëve në Lojërat Olimpike Dimërore Milano–Cortina, duke triumfuar në garën e kombinuar ekipore për meshkuj, së bashku me bashkëkombasin e tij Tanguy Nef.

Në garën e zhvilluar në pistën Stelvio, njëzet e katër vjeçari Von Allmen ka qenë i katërti më i shpejtë në zbritjen e shpejtë, disiplinë në të cilën kishte fituar dy ditë më parë. Fitorja është siguruar falë paraqitjes së Tanguy Nef në sllallom, i cili ka realizuar kohën më të mirë, duke e çuar Zvicrën në vendin e parë me kohë të përgjithshme 2:44.04.

Dyshja zvicerane ka fituar me diferencë bindëse prej 0.99 sekondash, duke lënë pas bashkëkombasit Marco Odermatt dhe Loic Meillard, si dhe çiftin austriak Vincent Kriechmayr – Manuel Feller.