Prokuroria Themelore në Gjakovë, Departamenti për Krime të Rënda, ka njoftuar se ndaj të pandehurit me inicialet V.K. është marrë Aktvendim për fillimin e hetimeve dhe është paraqitur kërkesë në Gjykatën Themelore në Gjakovë për caktimin e masës së paraburgimit në kohëzgjatje prej 30 ditësh.

“Ndër të tjera ceket se ekziston dyshimi i bazuar se i pandehuri me inicialet V.K., më datë 14.09.2025 rreth orës 11:00, në rrugën ‘Washington’ Gjakovë, saktësisht në pjesën e jashtme të kafiterisë ‘C.P.’ me dashje ka tentuar të privojë nga jeta të dëmtuarin R.B.,” thuhet në njoftimin e Prokurorisë.

Sipas njoftimit, i pandehuri pas një mosmarrëveshje me të dëmtuarin, me mjet të mprehtë – thikë, që e posedonte me vete e ka sulmuar atë duke e goditur tri herë në pjesët vitale të trupit, respektivisht dy herë në stomak dhe në dorë.

“Si pasojë e lëndimeve të pësuara nga goditjet me thikë, i dëmtuari menjëherë dërgohet në emergjencën e Spitalit Rajonal ‘Isa Grezda’ në Gjakovë dhe më pas për shkak të gjendjes së rëndë shëndetësore, dërgohet në QKUK për trajtim mjekësor,” thekson Prokuroria.

“Me këto veprime formohet dyshimi i bazuar se i pandehuri ka kryer veprën penale, vrasja në tentativë nga neni 172 lidhur me nenin 28 të KPRK-së,” vijon njoftimi.

I pandehuri që nga data 14 shtator 2025, me vendim të Prokurorit të Shtetit gjendet nën masën e ndalimit 48 orësh për veprën penale të lartëcekur.