Klubi i Futbollit Leicester City ka njoftuar se ka arritur një marrëveshje të ndërsjellë me trajnerin Ruud van Nistelrooy për përfundimin e menjëhershëm të kontratës së tij si trajner i ekipit të parë.

Holandezi, i cili mori drejtimin e Leicesterit në nëntor të vitit 2024, ka përjetuar një periudhë sfiduese në krye të skuadrës. Gjatë mandatit të tij, ai është dalluar për profesionalizëm, integritet dhe përkushtim ndaj objektivave të klubit, përfshirë edhe integrimin e disa talenteve premtues nga akademia në ekipin e parë.

Në një deklaratë pas largimit, van Nistelrooy u shpreh: “Dua të falënderoj lojtarët, trajnerët, akademinë dhe të gjithë stafin e Leicester City-t për bashkëpunimin dhe përkushtimin e tyre. Gjithashtu falënderoj tifozët për mbështetjen e treguar dhe i uroj klubit çdo të mirë për të ardhmen.”

Skuadra angleze ka bërë të ditur se përgatitjet për sezonin e ri në EFL Championship do të vazhdojnë sipas planit, me stafin aktual të trajnerëve që do të mbikëqyrë fazën e parasezonit që nis të hënën, më 30 qershor. Klubi do të njoftojë emrin e trajnerit të ri në kohën e duhur dhe nuk do të bëjë komente të tjera deri në përfundimin e këtij procesi.