Diplomati dhe analisti politik Lulzim Peci ka vlerësuar se Kosova, me vetëdije të plotë, është futur në periudhën më të paparashikueshme politike që nga shpallja e pavarësisë. Sipas tij, vendimi për të mos dërguar draft-statutin e Asociacionit në Gjykatën Kushtetuese ka sjellë pasoja të rënda duke penguar anëtarësimin e Kosovës në Këshillin e Evropës dhe duke mbyllur rrugët për integrim të mëtejshëm në BE dhe NATO.

Peci thekson se vendimet e marra kanë çuar në përkeqësimin e marrëdhënieve me Perëndimin, ndërsa lëvizjet në rendin botëror po favorizojnë qëndrimin e Rusisë, e cila ka insistuar që marrëveshja Kosovë-Serbi të ndodhë vetëm pas përfundimit të luftës në Ukrainë.

Ai paralajmëron se përfundimi i kësaj lufte mund të sjellë çarje të mëdha transatlantike dhe të ketë pasoja të mëdha për Kosovën. “Cilado qoftë rrjedha që do të marrë marrëveshja Kosovë-Serbi, mos u ankoni, sepse këtë e kemi dëshiruar vetë,” shkruan ai.

Sipas Pecit, Qeveria është fokusuar në taktika politike afatshkurtra, si rasti i urës së Ibrit duke neglizhuar pasojat strategjike. “Kështu përfundon kur veshët dëgjojnë vetëm atë që duan të dëgjojnë,” përfundon ai. /Kosova.info/