Olivier Giroud ka bërë të ditur të hënën se do të largohet nga AC Milan në fund të sezonit aktual, pas tri vitesh të qenit pjesë e skuadrës. 

Reprezentuesi francez, i cili mbërriti në “San Siro” në korrikun e vitit 2021 nga Chelsea, kishte ndihmuar skuadrën ta fitojë titullin e Serie A qysh në sezonin e tij të parë te Milan.

Milan ka shpërndarë një video ku Giroud ka konfirmuar vendimin e tij për t’u larguar nga klubi, megjithëse nuk ka specifikuar destinacionin e tij të ardhshëm.

Ka kohë që raportimet mediale e lidhin Giroud me një lëvizje në Major League Soccer, përkatësisht me Los Angeles FC.