Bordi i Federatës së Hendbollit të Kosovës ka pranuar dorëheqjen e Agron Shabanit nga posti i përzgjedhësit të Kombëtares A të Kosovës në konkurrencën e femrave duke e falënderuar për kontributin e dhënë gjatë më shumë se tetë viteve në krye të ekipit.

Shabani ishte emëruar selektor më 25 janar 2018 dhe gjatë periudhës së tij Kombëtarja e Kosovës arriti disa nga rezultatet më të rëndësishme në histori.

Nën drejtimin e tij, skuadra u konsolidua në kualifikimet për Kampionatin Evropian dhe kaloi me sukses dy herë fazën e parë kualifikuese për Kupën e Botës.

Ndër sukseset më të mëdha të kësaj periudhe ishin kalimi i Ishujve Faroe në kualifikimet për Botërorin 2023, si dhe fitoret ndaj Belgjikës dhe Bosnjë-Hercegovinës në rrugëtimin kualifikues për Botërorin 2025.

Po ashtu, Kosova regjistroi rezultate pozitive ndaj Qipros dhe Luksemburgut, si dhe zhvilloi përballje të forta ndaj kombëtareve më të mëdha të hendbollit.


Presidenti i Federatës së Hendbollit të Kosovës, Edin Kolgeci, në emër të Bordit dhe komunitetit të hendbollit kosovar, e falënderoi Shabanin për punën dhe kontributin e tij në zhvillimin e Kombëtares.