Zlatko Dalic ka dhënë dorëheqje nga posti i përzgjedhësit të Kroacisë pas një periudhe nëntëvjeçare, e cila konsiderohet ndër më të suksesshmet në historinë e futbollit të këtij vendi.

Federata Kroate e Futbollit ka konfirmuar largimin e Daliçit pak ditë pas eliminimit të Kroacisë nga Kupa e Botës 2026. “Vatrenët” u eliminuan në fazën e 1/32-tës së finales pas humbjes 2:1 ndaj Portugalisë.

Nën drejtimin e Daliçit, Kroacia përjetoi periudhën më të artë të saj në skenën ndërkombëtare. Në Botërorin 2018 në Rusi, kroatët arritën finalen dhe u shpallën nënkampionë të botës, ndërsa në Botërorin 2022 në Katar përfunduan në vendin e tretë.

“Kur mora drejtimin e kombëtares, besoja në cilësinë e lojtarëve dhe në veten time, por nuk guxoja të ëndërroja se do të arrinim gjithçka që kemi arritur gjatë këtyre gati nëntë viteve”, ka thënë Daliç.

Ai ka shtuar se ndihet krenar për çdo fitore, për kualifikimet në turnetë e mëdha dhe për tri medaljet e fituara me Kroacinë.

Gjatë mandatit të tij, pesëdhjetë e nëntë vjeçari udhëhoqi Kroacinë në 111 ndeshje, duke regjistruar gjashtëdhjetë e dy fitore. Përveç suksesit në Botërorë, ai e dërgoi skuadrën edhe në finalen e Ligës së Kombeve të UEFA-s në edicionin 2022/23.

Në Botërorin 2026, Kroacia kaloi fazën e grupeve duke përfunduar e dyta në Grupin L, por rrugëtimi i saj përfundoi ndaj Portugalisë. Pas ndeshjes, Dalic kritikoi disa vendime të gjyqtarëve, përfshirë një penallti të akorduar pas ndërhyrjes së VAR-it dhe një gol të anuluar në fund për pozitë jashtë loje të Joško Gvardiol.

Megjithatë, ai theksoi se gjykimi nuk ishte arsyeja e eliminimit.

Federata Kroate e ka falënderuar Dalic për sukseset, përkushtimin dhe mënyrën se si e udhëhoqi ekipin kombëtar gjatë këtyre viteve.