Alvaro Arbeloa është emëruar trajner i ri i Fulham në Premier League.

Klubi londinez ka bërë të ditur se ish-mbrojtësi i Real Madrid ka nënshkruar kontratë trivjeçare dhe do të marrë drejtimin e skuadrës në sezonet e ardhshme.

“Klubi është i lumtur të njoftojë emërimin e Alvaro Arbeloas si trajnerin e ri të Fulhamit”, thuhet në komunikatën zyrtare të klubit anglez.

Arbeloa, dyzet e tre vjeçar, ishte pjesë e kombëtares së Spanjës që fitoi Kupa e Botës 2010 dhe gjatë karrierës si futbollist pati shumë sukses me Real Madridin, ku fitoi dy trofe të Champions League.

Ai gjithashtu e njeh mirë futbollin anglez, pasi nga viti 2007 deri më 2009 luajti për Liverpool.

Në stolin e Fulham, Arbeloa zëvendëson Marco Silva, i cili u largua pas sezonit të kaluar pasi e udhëhoqi skuadrën drejt vendit të njëmbëdhjetë në Premier League. Silva tashmë është trajner i Benfica.

“Është një nder i madh për mua të nis këtë etapë të re te Fulham, klubi më i vjetër në Londër. Ndjej një përgjegjësi të madhe”, ka thënë Arbeloa.

Megjithatë, aventura e tij e fundit si trajner te Real Madrid nuk ishte e suksesshme. Ai mori drejtimin e skuadrës në janar të këtij viti pas largimit të Xabi Alonso, por periudha e tij u shoqërua me rezultate zhgënjyese.

Real Madrid u eliminua herët nga Kupa e Mbretit nga skuadra e kategorisë së dytë Albacete Balompie, humbi terren në garën për titull në La Liga dhe u eliminua nga Champions League në çerekfinale nga Bayern Munich.

Tashmë, Arbeloa ka mundësinë të rikthejë emrin e tij si trajner në një nga ligat më të forta në botë, duke nisur një kapitull të ri në Angli.