Winnipeg, Kanada – Ambasadorët e Shqipërisë dhe Kosovës vizituan këtë javë qytetin kanadez të Winnipeg-ut për të marrë pjesë në ceremoninë zyrtare të përurimit të një rruge të re që nderon komunitetin shqiptar dhe kosovar.

Rruga me emrin Dardania Drive, e vendosur në lagjen Sage Creek, u përurua me një ceremoni prerjeje shiriti. Në këtë ngjarje morën pjesë Ambasadorja e Shqipërisë në Kanada, znj. Artemis Malo, dhe Ambasadori i Kosovës në Kanada, z. Adriatik Kryeziu.

Emri Dardania i referohet lashtësisë ilire të trojeve shqiptare, një emër historik që lidhet ngushtë me Kosovën e sotme dhe trashëgiminë e lashtë të popullit shqiptar. Ky veprim simbolik nënvizon kontributin e shqiptarëve në shoqërinë kanadeze dhe rëndësinë e ruajtjes së identitetit kulturor edhe larg atdheut.

Komuniteti shqiptar në Winnipeg, i cili përfshin shumë familje nga Shqipëria dhe Kosova që kanë ardhur gjatë dekadave të fundit (veçanërisht gjatë viteve të luftës), tashmë ka një vend të vetin në hartën e qytetit – një njohje publike e pranisë, punës dhe integrimit të tyre të suksesshëm.

Kjo iniciativë është një shembull i bukur i respektit ndaj diversitetit kulturor në Kanada dhe një nderim për të gjithë shqiptarët që kanë kontribuar në ndërtimin e një shoqërie më të mirë larg vendlindjes.