Kosova

U paguan jashtëligjshëm si nënpunës civilë, ndonëse nuk janë të tillë – punëtorët e Fondit të Sigurimeve Shëndetësore

Ndonëse nuk janë nëpunës civilë, 44 punonjës të Fondit të Sigurimeve Shëndetësore marrin shtesën prej 30 eurosh në muaj. Kjo shtesë është e përcaktuar të jepet për nëpunësit civilë me një vendim të Qeverisë të vitit 2010.

Por bazuar në Ligjin për Sigurime Shëndetësore, punëtorët e Fondit nuk i takojnë shërbimit civil të Kosovës. Këto shtesa, sipas raportit të Zyrës Kombëtare të Auditorit për këtë institucion, për vitin që shkoi, ata i kanë marrë që prej muajit mars e deri në dhjetor. Vlera e mjeteve të dhëna jashtëligjshëm për këta punonjës vitin e kaluar është 13 mijë e 200 euro.

Ato mjete janë duke u paguar edhe këtë vit. Këtë e ka bërë të ditur Ministria e Financave. Në bazë të llogaritjeve gjatë këtij viti, këta punëtorë në mënyrë të kundërligjshme kanë marrë edhe 9 mijë e 200 e 40 euro. Zyrtarë të Fondit këtë pagesë, sipas Auditorit, e kanë arsyetuar duke thënë se shtesat realizohen nga Ministria e Administratës Publike, e cila tash funksionon bashkë me Ministrinë e Punëve të Brendshme. Nga ky institucion kanë thënë se veprimet për të sqaruar gjetjen e Auditorit i kanë marrë pasi që e kanë pranuar raportin, më 30 korrik të këtij viti dhe kanë thënë se procesimi dhe kalkulimi i pagave bëhen në Ministrinë e Financave.

Ata kanë theksuar se pas pranimit të raportit kanë kërkuar nga Ministria e Brendshme dhe ajo e Financave që të shqyrtojnë gjetjen e Auditorit, siç kanë thënë që të mund t’i japin një përgjigje Auditorit lidhur me të. KOHA ka kërkuar përgjigje lidhur me këtë çështje edhe në Ministrinë e Punëve të Brendshme dhe në atë të Financave. Nga e para kanë thënë se nuk janë përgjegjëse për këtë, ndërsa në Ministrinë e Financave kanë thënë se secila organizatë e ka për detyrë të kujdeset që përfitimet e punonjësve të saj të jenë të ligjshme. 

Lini një Përgjigje

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.