Kosova

Taksirati i taksës

“Skllota” që presidenti Hashim Thaçi ia ka përmendur një ditë më parë kryeministrit Ramush Haradinaj ka krijuar ambient rrëshqitës për koalicionin.

Haradinaj ka paralajmëruar të hënën se kjo javë mund të jetë e fundit për Qeverinë që e drejton, shkruan sot Koha Ditore.

E ka thënë këtë në një intervistë për Syri.net, pak kohë pasi ka kushtëzuar pezullimin e përkohshëm të taksës 100 për qind ndaj importeve serbe, me organizimin e një konference ndërkombëtare në të cilën do të mbërrihej marrëveshja përfundimtare ndërmjet Kosovës dhe Serbisë.

Në këtë mësymje ai nuk e ka mbështetjen e presidentit Thaçi, ndërkaq kryeparlamentari Kadri Veseli, i cili drejton subjektin kryesor në koalicionin qeverisës, ka thënë se gjuha kushtëzuese nuk e ndihmon Kosovën.

Opozita e ka nuhatur se Thaçi e Veseli do ta lënë në “lloç” Haradinajn.

Javën e shkuar, kreu i Qeverisë është përballur me trysninë e shtuar të faktorit ndërkombëtar, e veçmas SHBA-së. U është kundërvënë, duke përmendur një kusht. Ndërkaq, të hënën ambasadorëve të QUINT-it dhe përfaqësuesve të BE-së në Kosovë ua ka përcjellë edhe një shkresë, në të cilën e ka elaboruar më shumë kushtin.