EKONOMI

Shoqata e Naftëtarëve letër Kryeministrit Kurti: Jemi për respektim të standardeve evropiane

Shoqata e Naftëtarëve e Kosovës i ka dërguar letër Kryeministrit të Republikës së Kosovës z.Albin Kurti, prej të cilit kanë kërkuar mbështetje dhe intervenim të menjëhershëm rreth disa çështjeve – shkruan Kosova.info

Kryetari i kësaj shoqate z. Fadil Berjani, është zotuar për respektim të standardeve evropiane të tregut të naftës, por për të arritur deri këtu, duhet të evitohen disa anomali.

“Ne kemi qenë kundër ndërtimit të pikave të reja të karburantit” shkruan ndër të tjera në letër. Ai për këto çështje dhe për disa të tjera, ka kërkuar vëmendjen e qeverisë, përkatësisht vet Kryeministrit Kurti.

Ja letra e plotë:

“I nderuar Kryeministër Kurti,

Fillimisht më lejoni që në emrin tim personal dhe në emër të Shoqatës së Naftarëve të Kosovës të ju uroj postin e Kryeministrit të Kosovës, duke ju uruar shumë suksese gjatë qeverisjes suaj!

Ju njoftojmë se Shoqata e naftarëve ka kërkuar që të ketë kritere për ndërtimin e pikave të karburantit sipas standardeve të BE-së dhe kategorikisht kemi qenë kundër ndërtimit të pikave të reja të karburantit, por kërkesa jonë ka hasur në vesh të shurdhër deri më tani.

Një prej standarteve të BE-së është distanca në mes të pikave të karburantit, në rrugë lokale-komunale prej 5 deri në 10 km, rrugë magjistrale prej 10 deri në 15 km si dhe në autostrada prej 20 deri në 25 km.

Andaj, ne kerkojmë nga ju që të merrni masa sa ma shpejtë lidhur me këtë çështje shumë të ndjeshme pasi që jemi shteti më i vogel në botë por me më së shumti pika karburanti.

Prandaj edhe njëherë kërkojmë nga ju që të merrni masa që ky kriter të respektohet në tërsi.

Duke ju dëshiruar edhe njëherë suksese në punën tuaj, ju përshendes përzemërsisht.”