Bota

Putini ndryshon ligjin elektoral duke lejuar votimin elektronik

Rusët do të mund të votojnë në mënyre elektronike apo me anë të postës për zgjedhjet lokale dhe kombëtare si dhe për referendume, raporton Al Jazeera.

Presidenti i Rusisë, Vladimir Putin, ka aprovuar ndryshimet në ligjin elektoral të shtetit, duke lejuar që rusët të votojnë në mënyrë elektronike apo me postë në zgjedhjet e ardhshme, sipas Kremlinit.

Kundërshtuesit e këtij ndryshimi thonë se një sistem elektronik do të mund të manipulohet më lehtë, dhe do ta bëjë më të vështirë që të hetohen parregullsitë nga vëzhguesit e pavarur.

Ata thonë gjithashtu se ndryshimet po ndodhin në kohën kur kufizimet e koronavirusit e bëjnë të pamundur shprehjen e kundërshtimit me anë të protestave, transmeton KOHA.

Softueri i ri për votim elektronik do të jetë i gatshëm për tërë shtetin dhe mund të përdoret për zgjedhje lokale dhe kombëtare si dhe për referendume.

Sidoqoftë, nuk është e qartë nëse sistemi i ri do të jetë i gatshëm për referendumin e Kushtetutës, i cili do t’i hapë rrugën Putinit që të shërbejë edhe dy mandate presidenciale përtej viti 2024, duke e mbajtur në fuqi gjer në vitin 2036.

Referendumi do të mbahej në mes të prillit, por u anulua për shkak të pandemisë.

Sipas mediave ruse, data e re do të jetë 24 qershori.

Përkrahësit e këtij sistemi të ri thonë se kjo do të ndihmon në ndaljen e koronavirusit, sipas agjencisë së lajmeve TASS, ngase nuk do të duhen të shkojnë tek vendvotimet.