Kosova

Policia konfirmon arrestimin e kërcënuesit të prokurores Hajdari

Policia e Kosovës ka konfirmuar se është arrestuar njëri prej të dyshuarve që kërcënoi prokuroren speciale Drita Hajdari.

Zëdhënësi i Policisë së Kosovës, Baki Kelani, tha për Koha.net se po vazhdojnë procedurat e mëtejme ligjore.

“Lidhur me rastin në fjalë, pas hetimeve intensive dhe veprimeve policore, është arrestuar një person i dyshuar. Policia e Kosovës në bashkëpunim dhe koordinim me prokurorinë kompetente është duke vazhduar procedurat e mëtejme ligjore”, tha Kelani. 

Arrestohet njëri prej kërcënuesve të prokurores Drita Hajdari

Policia e Kosovës e ka arrestuar një person i cili sot gjatë ditës, bashkë me disa të tjerë, e ka kërcënuar prokuroren speciale Drita Hajdari.

Burime të KTV-së bëjnë me dije se ai është arrestuar në lagjen Kalabria në kryeqytet, derisa zyrtarët për media në Policinë e Kosovës ende nuk kanë dhënë informacione lidhur me rastin.

Prokurorja Drita Hajdari, sot gjatë ditës ka konfirmuar se ka marrë mesazhe kërcënuese për jetën nga disa persona. Ajo tha se është kërcënuar me likuidim fizik dhe hyrje në shtëpi të saj.

Prokurorja, e cila kishte ngritur njërën prej aktakuzave më të përfolura për rastin e njohur si “Pronto”, ka thënë se rastin e ka paraqitur në polici dhe se këto kërcënime vijnë pas fushatave linçuese ndaj saj.