Bota

Pas tetë viteve luftë, SHBA, Izraeli dhe Rusia arrijnë marrëveshje për Sirinë

SHBA, Izraeli dhe Rusia kanë arritur marrëveshje rreth shumicës së çështjeve sa i përket zgjidhjes së krizës në Siri, ka njoftuar Sekretari për Siguri i Rusisë, Nikolai Patrushev.

Ai është takuar me ndihmësin e presidentit amerikan për Siguri Nacionale, John Bolton dhe shefin e Këshillit për Siguri Nacionale të Izraelit, Meiro Ben Shabatin, transmeton Telegrafi.

“Jemi pajtuar rreth shumicës së pyetjeve dhe rreth asaj se si dëshirojmë ta shohim në fund Sirinë.”, ka shtuar Patrushev.

Sipas tij, terrorizmi mbetet një nga problemet kryesore në Siri, kurse provokimet në Lindjen e Mesme janë të vërteta.

“Pajtohemi plotësisht me mendimin e kryeministrit Netanayahu se si duhet të jetë Siria pas aksioneve tona: e qetë dhe e sigurt. Dua të shtoj se duhet siguruar sovraniteti, pavarësia, integriteti territorial i Sirisë.”, ka shtuar Patrushev.

Sekretari i Këshillit për Siguri i Rusisë, ka deklaruar se numri i terroristëve në Siri dhe Irak është dukshëm më i vogël, falë ndihmës së SHBA-ve.

Patrushev, Bolton dhe Ben-Shabat gjithashtu kanë diskutuar për raportet mes SHBA-ve dhe Iranit dhe rreth gjithë asaj që po ndodh në Lindjen e Mesme.