Kombëtare

Në “Luginën e Diellit” në mes të Zveçanit e Mitrovicës shenjtërohet kisha serbe

Në një lokacionin në mes të Mitrovicës dhe Zveçanit, që pritet të shndërrohet në vendbanim të ri për mbi 1.000 serbë, të martën është shenjtëruar themeli i kishës së ardhshme. Bëhet fjalë për lokacionin të njohur nga serbët si Lugina e Diellit.

Shenjtërimin e themelit të kishës e ka bërë “peshkopi i Rashkës dhe Prizrenit”, Teodosije, ka njoftuar “radiokim.net”.

Sipas këtij mediumi, në Luginën e Diellit pritet të jetojnë rreth 1.500 serbë të kthyer.

Në ceremoninë fetare të së martës ishin edhe klerikë të tjerë, ndërsa morën pjesë banorë të Zveçanit dhe Mitrovicës.

Peshkopi Teodosije ka thënë se kompleksi që po ndërtohet duhet të jetë shtëpi për të gjithë serbët që duan të qëndrojnë dhe të jetojnë në Kosovë.

“Vendbanimi duhet të jetë edhe për ata që për arsye të ndryshme është dashur të largohen nga anë të ndryshme, që nuk mund të kthehen në shtëpitë e tyre e që duan të jenë banorë të Kosovës. Duhet që ata të gjejnë këtu shtëpinë e tyre, strehimin e tyre në këto shtëpi të ndërtuara nga Qeveria e Republikës së Serbisë”, ka thënë Teodosije.

Në Luginën e Diellit është paralajmëruar ndërtimi i 300 njësive banesore. 250 janë përfunduar deri më tash. Projektin Bregu i Diellit e realizon Qeveria e Serbisë.

Sipas faqes zyrtare të projektit, lokacioni shtrihet në 24,5 hektarë, kurse vetëm vendbanimi shtrihet në 14,7 hektarë. Do të ndërtohen 21 objekte me nga katër banesa, 12 objekte me nga dy banesa, 47 objekte me nga një banesë dhe 70 objekte tjera po ashtu me nga një banesë, por më të vogla. Kompleksi do të ketë edhe objekte përcjellëse, ndër të tjera edhe kishën.

Leave a Reply

This site uses Akismet to reduce spam. Learn how your comment data is processed.