KULTURË

Ndërpritet xhirimi i serialit në Netflix nga Qeveria turke, pasi që në serial përfshihet një homoseksual

Netflix ka anuluar një dramë turke në prag të xhirimeve, me skenaristen e saj duke thënë se qeveria e bllokoi atë sepse përfshinte një karakter homoseksual brenda serialit.

Skenaristja Ece Yorenc tha se ndërmarrjes Netflix iu refuzua për realizimin e serialit “If Only” nga Qeveria e Turqisë, shkruan BBC.

“Për shkak të një personazhi homoseksual, leja për të filmuar serialin nuk u dha dhe kjo është shumë e frikshme për të ardhmen”, i tha ajo faqes së internetit të filmit turk Altyazi Fasikul, sipas FT .

Skenaristja Ece Yorenc (Foto: Getty Images/Guliver)

Netflix konfirmoi detajet e ngjarjes.

“If Only” do të tregonte historinë e Reyhan, një nënë e martuar pa fat, e binjakëve, e cila befas transportohet përsëri 30 vjet në natën që burri i saj i propozoi.

Yorenc tha që nuk kishte skena seksi mes homoseksualëve apo kontakt fizik midis burrit homoseksual dhe personazheve të tjerë.

Shërbimi i transmetimit nuk dëshiroi të përkulet ndaj kërkesave të Ankarasë, dhe në vend të kësaj vendosi të anulojë shfaqjen pas bisedimeve me autoritetin audioviziv të Turqisë RTUK, shtoi ajo.

Nënkryetari i partisë në pushtet në qeverinë turke, Mahir Unal, ka postuar në Twitter të hënën një status, ku ai beson se Netflix do të “tregojë ndjeshmëri më të madhe ndaj kulturës dhe artit turk me një bashkëpunim më të thellë” në të ardhmen.

Ndërsa homoseksualizmi ka qenë i ligjshëm përgjatë historisë moderne të Turqisë, kundërshtimi zyrtar ndaj komunitetit LGBT është rritur vitet e fundit. Parada e Krenarisë në Stamboll është ndaluar për pesë vjet me radhë.

Netflix tha se kompania mbeti “thellësisht e përkushtuar” për pajtimtarët e saj turq dhe ata në komunitetin krijues të vendit.
Në një deklaratë, ndërmarrja tha: “Aktualisht kemi disa skenarë origjinalë turq në prodhim – me më shumë të tjerë që do të vijnë dhe mezi presim t’i ndajmë këto histori me anëtarët tanë në të gjithë botën”.

Leave a Reply

This site uses Akismet to reduce spam. Learn how your comment data is processed.