Kosova

Muja lartëson partinë e tij: Për dy muaj qeverisje u dyfishua prodhimi në Trepçë

Deputeti i Lëvizjes Vetëvendosje Armend Muja ka thënë se ndërmarrjet publike do të përfshihen në një proces stabilizimi e më pas do të mendohet një strategji afatgjate për to.

Ai në RTV Dukagjini ka thënë se në shumë ndërmarrje publike, partitë politike që kanë qenë në pushtet deri më tani kanë punësuar militantë partiak duke i shkatërruar ato.

“Trepça është ndër ato ndërmarrje që në vitin 2016 ka pasur 16 milionë euro shitje, derisa kur kemi ardhur ne në pushtet e kemi gjetur me 8 milionë euro shitje. Trepça në Stantërg i ka 70 minatorë derisa i ka 1,300 punëtorë”, tha Muja përcjell Telegrafi.

“Me 1,300 punëtorë Trepça ka humbje nga 6-8 milionë euro në vit dhe askush se ka ngritur zërin sepse këto ndërmarrje ishin tentakula për të shtrirë pushtetin”.

Muja thotë se në dy muaj pasi LVV ka ardhur në pushtet është bërë plani afatshkurtër për të shtuar prodhimin.

“Ka rritje të disiplinës dhe nga disa të dhënë ka dyfishim të prodhimit”, deklaroi tutje deputeti i LVV-së.