Kosova

Miratohet Plani për parandalim dhe kontroll të COVID-19

Komiteti për monitorimin e sëmundjeve ngjitëse në Kosovë ka miratuar sot Planin për parandalim dhe kontroll të Covid-19 (Nëntor-Prill 2021), versionin 2.0.

Sipas njoftimit për media, në takimin e Komitetit mori pjesë edhe Ministri i Shëndetësisë Armend Zemaj.

Ai tha se situata aktuale kërkon një angazhim dhe përkushtim shtesë për të kontrolluar situatën, ndërsa Qeveria dhe Ministria e Shëndetësisë do të mbështesin punën e profesionistëve shëndetësor në angazhimin e tyre për gjurmimin e rasteve me Covid-19, testimin e tyre dhe trajtimin klinik.

“Jemi në një moment kur rastet kanë shënuar rritje kudo, prandaj nga ne kërkohet që të vazhdojmë me angazhime sikurse deri më tani për të mbajtur situatën nën kontroll”, tha Zemaj.

Drejtori ekzekutiv i IKSHPK-së, Naser Ramadani tha se Plani për parandalim dhe kontroll të Covid-19 (version 2.0) përfshin strategjinë e veprimit: gjej, testo, gjurmo, izolo me ofrim të testimeve laboratorike (publik dhe privat), përfshirje të organizatave të sektorit publik dhe privat dhe sigurimin e të gjitha burimeve të nevojshme për të mundësuar zbatimin e Planit për parandalim dhe kontroll të COVID-19.

Aspekte të detajuara nga Plani ka prezantuar dr.Ariana Kalaveshi, udhëheqëse e Departamentit të Epidemiologjisë në IKSHPK.

Plani i miratuar nga Komiteti për monitorimin e sëmundjeve ngjitëse ka pesë pjesë të ndërlidhura mes veti siç janë: planifikimi dhe parashikimi, minitorimi i situatës dhe vlerësimi i riskut, menaxhimi i riskut dhe koordinimi, organizimi institucional, hulumtimi dhe reagimi si dhe komunikimi dhe komunikimi i riskut.