Kosova

Miftaraj: Presioni i shoqërisë civile dhe vendeve mike detyrojnë ‘Qeverinë Hoti’ ta kthejë Task-Forcën kundër korrupsionit

Qeveria e Kosovës do ta kthej përsëri Task-Forcën anti-korrupsion e cila u shfuqizua ditë më parë.

Drejtori i Institutit të Kosovës për Drejtësi, Ehat Miftaraj, ka bërë të ditur se ka dështuar përpjekja e “Qeverisë Hoti”, për ta shuar Task-Forcën kundër korrupsionit, shkruan lajmi.net.

Miftaraj përmes një postimi në profilin e tij zyrtar në rrjetin social Facebook, ka bërë të ditur se ky është një lajm jashtëzakonisht i mirë, duke theksuar se presioni i shoqërisë civile dhe vendeve mike, e kanë detyruar kryeministrin Avdullah Hoti dhe ministrin e Punëve të Brendshme, Agim Veliun, që të tërhiqen nga iniciativa e tyre, siç e ka quajtur Miftaraj, e kundërligjshme.

Postimi i plotë i Miftarajt, pa ndërhyrje:

Dështon përpjekja e Qeverisë për të shuar Task Forcën kundër Korrupsion.  Presioni i shoqërisë civile dhe vendeve mike, detyrojnë Kryeministrin Hoti dhe Ministrin Veliu të tërhiqen nga iniciativa e kundërligjshme!

Lajm jashtëzakonisht i mirë.

Task Forca vazhdon punën njejtë si deri me tani, nën udhëheqjen dhe urdhërat e PSRK, deri në një vendim tjetër që duhet të bazohet në ligj, analizë përmbajtësore, konsultim me akterët relevantë vendorë dhe ndërkombëtarë.

Sigurisht në javët dhe muajt në vazhdim hakmarrja ndaj zyrtarëve të caktuar të Task Forcës do të intensifikohet ku nuk përjashtohet mundësia e inicimit të ndjekës penale dhe procedurave disiplinore.

Çka mësuam këto dy javë është se shumë ekspertë luftën kundër krimit të organizuar dhe korrupsionit ia dedikuan vetëm një organi si Task Forca.

Shumë prej tyre nuk e “kuptuan”  fare se Prokurori I Shtetit sipas Kushtetues dhe ligjit eshte autoriteti qe duhet lëvduar nëse ka rezultate dhe kërkuar llogari nëse nuk kemi rezultate në krim të organizuar dhe korrupsion.

Dorën në zemer shumica e “eksperteve” milionat i kanë për shkak të dostave në prokurori.  Ec e fol kundër dostave e kundër milionave.