Bota

Mashtroi se ishte e sëmurë për të darkuar me Putinin, aktorja rrezikon burgun

Aktorja italiane, Ornella Muti, përballet me një dënim me burg, në rast se nuk e paguan dëmshpërblimin për anulimin e performancave të saja teatrore, në mënyrë që të merrte pjesë në një gala mbrëmje me presidentin rus, Vladimir Putin dhe kolegun amerikan, Kevin Costner.

Ajo është dashur të shfaqej në skenën teatrore në dhjetor të vitit 2010, por kishte thënë se është e sëmurë.

Në vërtetimin e rrejshëm mjekësor i ishte rekomanduar pushim pesëditor. Mirëpo, në atë periudhë, aktorja ishte nisur për në St. Petersburg të Rusisë për të marrë pjesë në një mbrëmje gala.

Ornella Muti (Foto: Tristan Fewings/Getty Images/Guliver)

Një Gjykatë Themelore në Itali e ka dënuar me gjashtë muaj lirim me kusht, 500 euro gjobë me para dhe 30.000 euro dëmshpërblim për teatrin Verdi në Pordenone në verilindje të Italisë.

Pasi u publikuan fotografitë, në të cilat ajo shfaqej pranë Putinit, gjykata e paralajmëroi se do të shkonte në burg në rast se nuk e paguante dëmshpërblimin.

View image on Twitter

Mediat italiane raportojnë se Muti ka afat prej një muaji që ta paguajë dëmshpërblimin para se gjykata të sjellë një vendim të ri.

Në vitin 2015, aktorja i kishte thënë gjykatës se nuk ka mjete për ta paguar dëmshpërblimin, ndërsa para dy vitesh ajo dhe familja e saj janë dëbuar nga banesa në Romë për shkak të borxheve të papaguara ndaj një agjencie të patundshmërisë.