Kosova

Lajçak të hënën takohet me Vuçiqin, flasin për dialogun Kosovë-Serbi

Emisari special i Bashkimit Evropian për dialogun Kosovë-Serbi, Miroslav Lajçak gjatë ditës së nesërme do të vizitojë Serbinë.

Lajçak në ditën e parë të vizitës së tij në Serbi do të takohet me presidentin e shtetit, Aleksandar Vuçiq, ku pritet që atij t’ia përcjell pikëpamjet e kryeministrit të Kosovës, Albin Kurti, me të cilin Lajçak zhvilloi dy takimi përgjatë vizitës që pati në Prishtinë javën që po lëmë pas.

Lajçak deklaroi se vizitat në Kosovë dhe në Serbi synojnë një përpjekje të Bashkimit Evropian për të arritur hapin e shumëpritur dhe të nevojshëm përpara në dialogun midis Prishtinës dhe Beogradit, transmeton lajmi.net.

“Kjo është vizitë e imja e rregullt në mënyrë që të bisedoj me udhëheqësit sesi të përparojmë më tej në procesin e dialogut”,tha ai.

Duhet përkujtuar që Lajçak qëndroi në Kosovë për tri ditë, ku përveç krerëve të institucioneve, ai takoi edhe liderët opozitarë.