Kosova

Krasniqi: Islami nuk justifikon vrasjet e njerëzve në katedrale

Hoxhë Shefqet Krasniqi në “Personale” me Krenare Vokshi-Shala në RTV Dukagjini ka folur për zhvillimet e fundit në botë pas publikimit të karikaturave të Profetit Muhamed nga një revistë satirike franceze, e që më pas rezultuan me disa akte terroriste në Francë.

Hoxha thotë se pejgamberët e Zotit janë fyer ndër vite por që sipas tij kjo nuk i dëmton ata.

“Edhe Profetin Muhamed e persekutuan arabët në mënyra më të rënda, por ai asnjëherë në jetën e vet nuk është hakmarrë as edhe ndaj armiqve”, tha ai, përcjell Telegrafi.

Krasniqi thotë se dhuna nuk është zgjidhje asnjëherë për t’i zgjidhur problemet.

Hoxha thotë se çdo mysliman ka dënuar aktin makabër që e bëri në një kishë në Francë një i ri tunizian.

“Me çfarë të drejte ai futet në një kishë ku njerëzit po luteshin në mënyrën e vet. Çfarë faji kishin ata të moshuar që po luteshin në mënyrën e vet për t’iu falur ndonjë gjynah. Këtë vepër më së paku e justifikon feja islame”.

Krasniqi thotë se Profeti Muhamed nuk ka përdorur dhunë dhe nuk justifikohem mbrojtja e tij me dhunë.

“Zoti e ka mbrojtur dhe e mbron Muhamedin”, tha ndër të tjera Shefqet Krasniqi.