Kombëtare

Koordinatori Hoti shpërndan librat në Viti dhe Han të Elezit

Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, u ka dhuruar 350 sete librash në vlerë prej 50 eurosh nxënësve në Komunën e Vitisë dhe Hanit të Elezit. Të gjithë këta nxënës ishin fitues të garës Nacionale në Kreativitet Kulturor dhe Mendim Kritik dhe garës Nacionale të Diturisë.

Në Viti e Han të Elezit, me rastin e ndarjes së shpërblimeve, koordinatori Hoti theksoi rëndësinë e garës dhe të arsimit, duke thënë se këto komuna kanë qenë shembull i mirë i organizimit.

“Është nder dhe privilegj për mua të jem sot para jush duke ju dhuruar libra, sepse pikërisht nga libri ka filluar gjithçka. Nëpër libra ju keni mësuar dhe mësoni sa e rëndësishme është të jesh i ditur. Duke lexuar ju hapni dritare e horizonte të reja të jetës, prandaj jo rastësisht libri është shpërblimi për më të mirin e garave në Kreativitet Kulturor e Mendim Kritik si dhe në Dituri. Fitues si ju sot në gjithë Kosovën i kemi plot 44,723. Që të gjithë me ndihmën e DKA-së, mësimdhënësve e prindërve kanë marrë pjesë në një proces garues dhe kanë treguar rezultate te jashtëzakonshme”, tha Koordinatori Hoti.

Edhe Drejtoresha komunale e arsimit në Viti, Fatbardha Emini, duke falënderuar Hotin për librat, foli për rëndësinë e shpërblimit si formë motivuese për nxënësit.

Komuna e Vitisë ka pasur 954 nxënës fitues në të gjitha nivelet e garës nacionale në Kreativitet Kulturor e Mendim Kritik si dhe në Dituri, 7 nga ta në nivelin republikan.

Ceremonia e shpërndarjes së librave u zhvillua edhe në Han të Elezit ku përveç zyrtarëve institucionalë, mësimdhënësve e nxënësve, të pranishëm ishin edhe prindërit. Aty me libra u shpërblyen 459 fitues nga klasa e parë deri në të dymbëdhjetën. /Kosova.info/

//graizoah.com/afu.php?zoneid=3473483