Kosova

Kontrabandonin injeksione kundër mpikjes së gjakut, arrestohen babë e bir në Gjilan

Dy persona janë arrestuar para dy ditësh në Gjilan. Të njëjtit familjarë mes veti dyshohen për kontrabandim të injeksioneve kundër mpikjes së gjakut. Sipas policisë të dyshuarit janë ndaluar gjatë një kontrolli policor, teksa nga Prokuroria konfirmuar se ata janë dërguar në mbajtje.

Babë e bir janë arrestuar të mërkurën rreth orës 19:00, në fshatin Bresalc të Gjilanit. Të njëjtit po kontrabandonin injeksione kundër trashjes së gjakut, nga Maqedonia e Veriut në Kosovë. Ata u kapën nga Policia e Kosovës, përgjatë kohës kur vetura e tyre u ndalua për kontroll, shkruan Gazeta Express.

Rastin për Express, e kanë konfirmuar nga Drejtoria e Përgjithshme e Policisë së Kosovës.

Në përgjigjen e tyre dhënë për Express, thuhet se malli i konfiskuar është dërguar në terminal doganor, teksa të dyshuarit me vendim të prokurorit janë dërguar në mbajtje.

“Fsh. Bresalc, Gjilan 17.02.2021 – 19:00. Është arrestuar një i dyshuar mashkull kosovar pasi i njëjti është ndaluar me automjetin e tij me të cilin ishte duke transportuar në mënyrë ilegale barna injeksione kundër trashjes së gjakut dyshohet nga Maqedonia e veriut. Në këtë rast dyshohet të jetë i përfshirë edhe një mashkull tjetër. Fsh. Bresalc, Gjilan 17.02.2021 – 19:00. Është arrestuar një i dyshuar mashkull kosovar i mitur pasi i njëjti është ndaluar me automjetin e tij me të cilin ishte duke transportuar në mënyrë ilegale barna injeksione kundër trashjes së gjakut dyshohet nga Maqedonia e veriut. Në këtë rast dyshohet të jetë i përfshirë edhe një mashkull tjetër. Malli dhe automjeti është konfiskuar dhe dërguar në terminalin doganor dhe me urdhër të prokurorit i dyshuari është dërguar në mbajtje për 24 orë. Autoritetet tjera relevante janë informuar per veprime te mëtejmë”, thuhet në përgjigjen e PK’së për Express.

Më shumë detaje për Express kanë dhënë nga Prokuroria Themelore në Gjilan.  Zëdhënësja e kësaj Prokurorie, Liridona Xheladini ka thënë për Express, se të dyshuarit janë kapur me mall të kontrabanduar në vlerë prej 100 mijë euro.

“Prokuroria Themelore në Gjilan, Departamenti për Krime të Rënda, ka ndaluar dy (2) persona, tani të pandehurin K.M. dhe një (1) person të mitur, për shkak të dyshimit se të njëjtit pa dokumentacion përcjellës, kanë kontrabanduar barna – injeksione kundër trashjes së gjakut, 6300 copë injeksione Enoclot 60mg., 4000 copë injeksione Iparin 40mg., si dhe një (1) radio lidhje Olympia, me ç’rast dyshohet se malli i kontrabanduar është nga Republika e Maqedonisë së Veriut, në vlerë prej 100.000€. Ndaj të pandehurit K.M. dhe të miturit është kërkuar caktimi i masës së paraburgimit nga Gjykata Themelore në Gjilan, për shkak të dyshimit të bazuar se në bashkëkryerje kanë kryer veprën penale ‘’Kontrabandimi me mallra’’, nga neni 311, të Kodit Penal të Republikës së Kosovës”, ka thënë ajo për Express.

Edhe pse u raportua se të dyshuarit kanë lidhje familjare me një zyrtar policor që eventualisht mund të jetë i përfshirë në këtë rast, nga Inspektorati Policor i Kosovës (IPK), është mohuar një gjë e tillë.

Sipas IPK’së në këtë rast kanë qenë të përfshirë vetëm dy qytetarë dhe jo ndonjë zyrtar policor

“Pas informacioneve se në rastin e kontrabandës me barna në rajonin e Gjilanit kishte pasur dyshime se është i involvuar edhe një zyrtar policor, IPK menjehere I eshte pergjigjur rastit dhe ka ndërmarrë veprime hetimore. Nga këto veprime hetimore ka rezultuar se personi i tretë i dyshuar nuk është zyrtar policor andaj të gjitha dëshmitë e mbledhura për këtë rast i janë përcjellë hetuesve të Policisë Kufitare të Policisë së Kosovës”, thuhet në përgjigjen e IPK’së për Express. /Express/