OPINION

Jo heshtje, meditim për votim!

Shkruan: Florim ZEQA
Qytetarë të dashur të vendit tim, elektorat i respektuar i të gjitha partive politike.

Pas parafushatës tre javore dhe fushatës së zhurmshme e shurdhuese 10 ditore të partive politike, pas premtimeve megalomane të kandidatëve për kryeministra, radha ju erdhi juve qytetarë dinjitoz të Republikës së Kosovës, që të mendoni mirë para se të votoni.

Elektorat besnik i partive politike, premtimet dhe deklaratat që i keni dëgjuar gjatë fushatës zgjedhore janë pak të besueshme, për shkak të mungesës së sinqeritetit dhe pafuqisë së realizimit të tyre, pra janë vetëm retorikë zgjedhore sa për t’ua grabitur votën e asgjë më shumë.

Politika është art i së mundshmes e cila bazohet në gënjeshtra, mashtrime, marrëzi, urrejtje dhe skizofreni. Gjuha e politikanëve të korruptuar plot gënjeshtra tingëllon si gramafon i prishur.

Përqasje elektorale

Pas zgjedhjeve të 6 tetorit, me ardhjen e serishme në pushtet të një klase të korruptuar, qytetet dhe fshatrat e Kosovës rrezikojnë zvogëlim enorm të popullatës dhe rritje të numrit të qeneve endacak.

Qytetarët e Kosovës, të lodhur nga varfëria ekstreme dhe denigrimi social, pa asnjë shpresë për ardhmëri, do ta braktisin Kosovën për të mos u kthyer më asnjëherë në “tokën e nëmur”, të zaptuar nga krimi i organizuar i bastardëve politik.

Qytetarët janë lodhur nga ky sundim i egër i mafio-oligarkisë politike, në të dyja nivelet e qeverisjes, dhe nuk po mund të durojnë më tej denigrimin dhe përbuzjen e pushtetarëve.

Janë lodhur aq shumë saqë për çdo ditë dëgjojmë lajme për të rinjtë me shpresa të thyera që i “mbushët autobusët” dhe ia mësyjnë Perëndimit për një jetë më të mirë.

Për më keq se kaq, Kosovës është duke i ikur truri dhe shpirti i saj. Janë shpeshtuar rastet e largimit të mjekëve dhe infermierëve, i largimit të kuadrove më të përgatitura në fushën e ekonomisë, arsimit, shkencës, kulturës, sportit,…etj.

Duke e ndjerë rrezikun e ardhjes në pushtet të klasës sa të inkriminuar po aq të ricikluar politike, vërehet rënie e interesimit për dalje në zgjedhje.

Qytetarët, nuk e kanë as motivin minimal për të dalë në zgjedhje, për ti votuar të njëjtat figurat politike, e lërë më t’u besojnë tutje partive politike dhe liderëve të tejinkriminuar, të cilët për 20 vite rresht asnjëherë nuk u përkujdesen për mirëqenien e qytetarëve, por që u kujdesen vetëm për rrëmbimin e pushtetit dhe zhvatjen e shtetit.

Për qytetarët e zhgënjyer në këtë klasë të korruptuar politike, ditët e parafushatës dhe fushatës elektorale, me plot gënjeshtra dhe premtime (mashtrime) ishin sa të gjata po aq  të mundimshme.

Sikur të realizoheshin vetëm 10 % e premtimeve elektorale, Kosova do të shndërrohej në parajsë për qytetarët e vendit.

10 ditët e gjata, të “mrekullive” të mëdha

Pas 10 ditëve të gjata të “mrekullive” të mëdha, më 6 tetor “Musketarët” i matin forcat, të nesërmen me 7 tetor i fillojnë pazaret politike për pushtet, do t’i harrojnë tërësisht premtimet e dhëna qytetarëve…                  

Qytetarët e vendit tim, më 6 tetor e kanë një mundësi të mirë që ta ndëshkojnë me votë këtë klasë kusarësh politikë që po bëjnë pazare me shtetin dhe po luajnë me fatin e qytetarëve.

Kosova është vendi i vetëm në rajon e ndoshta edhe në botë, ku politikanët milionerë i blejnë më së liri votat dhe shesin më së shtrenjti premtimet e tyre.

Si zakonisht çmimin e mashtrimeve të tyre e paguan popullata e varfër, që do të mbetët sërish duke pritur deri në zgjedhjet e radhës pa e shijuar fare aromën e mrekullisë së premtuar.

Qytetar të dashur të Republikës së Kosovës, mesazhi i këtij shkrimi është i qartë dhe i sinqertë, mos bini pre e premtimeve boshe elektorale të kandidatëve për kryeministra,…vëni gishtin kokës dhe mendoni mirë para se të votoni. Vota e juaj me 6 tetor vlen pak më shumë se; 20, 50 apo 100 euro,…vota e juaj vlen më shumë se një vend pune, vota e juaj vlen më shumë se çdo interes personal, vota e juaj e ka vlerën e artë të veriut të vendit, i cili rrezikon të humbet nga procesi negociatorë me Serbinë.

Ata që ju harruan dje kur ju iu dhuruat votën, do t’ju harrojnë edhe nesër e përgjithmonë. Vota e juaj më 6 tetor është votë që determinon të ardhmen e shtetit dhe fatin tonë të përbashkët nesër, e në mënyrë të veçantë fatin e veriut të vendit.

Largoni klasën e inkriminuar politike

Qytetarë të vendit tim, është në dorën e juaj që më 6 tetor ta zgjidhni një përbërje të re deputetëve që përfaqësojnë denjësisht interesat e juaja në Parlamentin e Kosovës.

Nga këtu, shfrytëzoj nga rasti, që edhe një herë t’ju bëjë thirrje qytetarëve të vendit, mos votoni sy mbyllur, por hapni sy e vesh, kthjellni mirë mendjen para se të votoni nëse nuk dëshironi të vuani e vajtoni edhe për shumë vite të tjera.

Deri më sot në zjarrin e dashurisë për pushtet në gjysmë shtet janë djegur disa kryeministra, shumë politikan dhe lider partiak, shpresoj që kësaj radhe të dele së paku një kandidatë i vetëm për kryeministër që i shpëton “zjarrit përvëlues…”

Fundi i maskaradave zgjedhore dhe loja e politikanëve me ndjenjat e popullatës së varfër do të marrin fund vetëm me largimin e tërësishëm të kësaj klase politike. Ngase, nëse mbetët edhe vetëm një politikanë i inkriminuar, do ta dekontaminojë përsëri skenën e re politike.

Politikanët e korruptuar janë kudo dhe në të gjitha listat zgjedhore. Elektorati e ka shansin historik që t’i largoi me votë abuzuesit e pushtetit,…që të gjithë ata, në një mënyrë apo tjetër janë të lidhur edhe me nepotizmin, korrupsionin dhe krimin e organizuar në vendin tonë.

Politikanët e inkriminuar, aty ku i ndanë pushteti qendror, i bashkon ai lokal, i bashkojnë bizneset dhe punët e pista në zhvatjen e buxhetit dhe plaçkitjen e qytetarëve (mërgimtarëve).

Mundësia më e mirë për arritjen e ndryshimit në skenën parlamentare dhe ndëshkimin e politikanëve të korruptuar dhe tejinkriminuar, është vota për kandidatët e rinj për deputet, të pastër e të padjallëzuar që mbrojnë të drejtat e juaja dhe shtetit të Kosovës e jo të liderëve partiakë dhe oligarkëve politikë.

Përzgjedhjen e këtyre deputetëve mund ta bëni secili nga ju në listat zgjedhore të partive të preferuara nga numri 80-110 dhe anasjelltas. Mbase kjo është e vetmja mundësi për të sjellë ndryshim dhe freski në Parlamentin e Kosovës.

Përderisa popullit i imponohet vota, e nuk lihet i lirë të bëjë zgjedhjen sipas dëshirës dhe bindjeve të veta, vështirë do ndodhë ndryshimi në këtë vend.

Zoti e bekoftë votën e lirë të njerëzve të lirë!

Leave a Reply

Your email address will not be published.