Kosova

Janë nxjerr nga miniera e Artanës trupat e dy minatorëve

Janë nxjerrë nga miniera e Artanës trupat e dy minatorëve, inxhinierit Haki Arifi e xehetarit Idriz Gërbeshi, që kishin mbetur nën rrënoja si pasojë e shembjes së dheut në këtë minierë, të martën në mëngjes. 

Pas një pune disa orëshe, Arsim Gërxhaliu nga Instituti i Mjekësisë Ligjore ka bërë të ditur se trupat janë nxjerrë në orët e para të së mërkurës. 

“Duke i falenderuar djemtë tanë të FSK-së, për mundin e paparë për ta thyer shkëmbin, si dhe ekipin e Mjekësisë Ligjore, trupat e dy minatorëve, u nxorën nga miniera”, ka shkruar ai në Facebook, teksa KOHËS i ka thënë se të mërkurën paradite do të bëhet obduksioni. 

Të martën, Qeveria në detyrë e Kosovës bëri të ditur se ka ndarë nga 30 mijë euro për familjet e të vdekurve dhe ka mundësuar bursa për anëtarët e familjes që po vazhdojnë mësimin teksa është premtuar një vend pune për të birin e Gërbeshit.