SHËNDETËSIA

Ismaili: Po themelohet zyra koordinuese në Ministrinë e Shëndetësisë, për ambient dhe ajër më të pastër

Po themelohet zyra koordinuese në Ministrinë e Shëndetësisë, e cila do të merret çdo ditë me dizajnimin e politikave për ambient dhe ajër më të pastër, e mbështetur me ekspertizë të Organizatës Botërore të Shëndetësisë dhe të shumë donatorëve tjerë.

Kështu bëri të ditur në një postim në rrjetin e tij social Facebook, ministri i Shëndetësisë Uran Ismaili.

Ismaili tha se përkundër shqetësimit të madh, në Kosovë vazhdimisht është anashkaluar nisja e politikave për zgjidhjen e problemit me ajrin e ndotur.

Sipas tij, jetesa në ajër të ndotur nuk është më zgjidhje.

“Përkundër se ka qenë shqetësim i madh, në Kosovë vazhdimisht është anashkaluar nisja e politikave për zgjidhjen e problemit me ajrin e ndotur, për shkak se ballafaqimi me këtë sfidë është i gjatë dhe me rezultate jo të shpejta. Mirëpo, jetesa në ajër të ndotur nuk është më zgjidhje. Pas një angazhimi disamujor, po themelojmë zyrën koordinuese në Ministrinë e Shëndetësisë, të mbështetur me ekspertizë të Organizatës Botërore të Shëndetësisë dhe të shumë donatorëve tjerë, që do të merret çdo ditë me dizajnimin e politikave për ambient dhe ajër më të pastër. Të vetëdijshëm që na pret një rrugë e gjatë, kësaj sfide të madhe po i qasemi me vullnet të plotë që të nisim këtë projekt të domosdoshëm sot, që e nesërmja të jetë më e jetueshme. #BashkëeNdreqim”, ka shkruar në Facebook, ministri Uran Ismaili.