Kosova

Hoxhaj: Avancimi dhe integrimi i komunitetit Rom prioritet i Qeverisë së Kosovës

Zëvendëskryeministri i Republikës së Kosovës, Enver Hoxhaj, mori pjesë në shënimin e Ditës së Komunitetit Rom, organizuar nga Zyra e Kryeministrit/ Zyra për Çështje të Komuniteteve. 

Duke e vlerësuar këtë si ditë të veçantë për Kosovën, zëvendëskryeministri Hoxhaj tha se historikisht kanë jetuar për shumë shekuj me komunitetin Rom në Kosovë. “Kanë qenë pjesë e procesit të lirisë tonë, të shtetndërtimit, të zhvillimeve në vend, të nënshkrimit të Pavarësisë së Kosovë, kanë marrë pjesë në zgjedhje për Parlamentin e Kosovës dhe jemi krenarë që krahasuar me shumë vende në rajon dhe në Evropë, romët si komunitet çdo herë e kanë pasur një zë të fortë në Kuvendin e Kosovës”, tha zëvendëskryeministri Hoxhaj, duke theksuar se ky komunitet çdo herë është përfaqësuar në të gjitha institucionet, në nivelin qendror dhe lokal.

Po ashtu, zëvendëskryeministri Hoxhaj, tha se Kosova është vend demokratik dhe multietnik dhe dita e këtij komuniteti është ditë po ashtu për të gjithë qytetarët e Kosovës. 

Zëvendëskryeministri Hoxhaj, shtoi se për këto 10 vjet ka pasur arritje konkrete për përfshirjen e komunitetit Rom në të gjitha fushat e jetës, përfshirë edukimin, por edhe punësimin, shëndetësinë, mirëqenien sociale dhe një banim të sigurt dhe afatgjatë. 

“Kjo ditë nuk duhet të na shërbejë vetëm si ditë e kremtes, por si ditë e përkushtimit për t’i adresuar pritjet e ardhshme që ka komuniteti Rom në Kosovë. Qeveria e Kosovës është pjesë e projektit “Integrimi i Romëve 2020”, që financohet nga Komisioni Evropian dhe ftoj të gjithë që përmes këtij projekti të bëjmë më shumë për avancimin dhe integrimin e komuniteti Rom në Kosovë”, tha zëvendëskryeministri Hoxhaj. 

Deputeti Albert Kinolli, nga Partia Rome e Bashkuar e Kosovës (PREBK), tha se ndjehen krenarë që janë pjesë e institucioneve të Republikës së Kosovës, duke u përfaqësuar në Kuvend, Qeveri dhe në institucione tjera, në të njëjtën kohë ka falënderuar institucionet e Republikës së Kosovës për mbështetjen e vazhdueshme të komunitetit romë në Kosovë.

Më tej, deputeti Kinolli tha se komuniteti Rom ka qenë dhe vazhdon të jetë pjesë aktive e shtetndërtimit të institucioneve të Kosovës, duke numëruar një varg projektesh, tha se nga muaji i ardhshëm ky komunitet do të jetë përfitues i një projekti madhor të ndërtimit dhe rindërtimit të 42 shtëpive, projekt ky që do të ndikojë dukshëm në përmirësimin e mirëqenies së këtij komuniteti./Kosova.info