Kosova

Hoti: Prishtina me 23.3 milionë euro suficit si pasojë e dembelisë dhe mosdijes së udhëheqjes

Shefi i Grupit Parlamentar të LDK-së, Avdullah Hoti deklaroi se Komuna e Prishtinës në vitin 2018 ka shpenzuar vetëm 43% mjeteve për investime kapitale, që sipas tij është niveli më i ultë i realizimit të projekteve kapitale krahasuar me të gjitha komunat e Kosovës.

Hoti, përmes një postimi në Facebook, ka thënë se “si rezultat i dembelisë e mosdijes të udhëheqësisë së Komunës për të kryer projektet kapitale, Komuna e Prishtinës ka suficit prej 23.3 milionë euro.

Postimi i plotë i Hotit:

“PRISHTINËS I TEPROJNË 23.3 mil EURO NGA VITET 2017 DHE 2018

Komuna e Prishtinës në 2018 ka shpenzuar vetëm 43% mjeteve për investime kapitale, që është niveli më i ultë i realizimit të projekteve kapitale krahasuar me të gjitha komunat e Kosovës.

Si rezultat i dembelisë e mosdijes të udhëheqësisë së Komunës për të kryer projektet kapitale, Komuna e Prishtinës ka suficit prej 23.3 milion euro.

Prej tyre, 9.5 mil euro janë mjete që nuk janë shpenzuar që nga viti 2017, dhe 13.8 mil euro nga viti 2018.

Sa parqe, rrugë e ndriqim do të ishin kryer me 23.3 mil euro? Sa shkolla do të ishin pajisur me kabinete për punë praktike për nxënës? Sa drunj do të ishin mbjellë? Sa parkingje do të ishin ndërtuar?

(Këto të dhëna janë nga raporti financiar për 2018 i Qeverisë së Kosocës)”, ka shkruar Hoti.