SPORT

Herolind Shala pritet të jetë kapiten i Kosovës kundër Suedisë

Përfaqësuesja e Kosovës do të përballet me Kombëtaren e Suedisë në një ndeshje luksi miqësore.

Ky takim miqësor i dy shteteve mike do të zhvillohet në kryeqytetin e Katarit, Doha me fillim nga ora 15:45 me kohën tonë lokale.

Trajneri i Kosovës, Bernard Challandes ka grumbulluar shumë futbollistë të rinj për këtë sfidë, ku 13 nga ta janë nga Superliga e Kosovës.

Herolind Shala, Anel Rashkaj, Elbasan Rashani, Fidan Aliti e Visar Bekaj janë grumbulluar rregullisht me Kosovën edhe më parë, ndërsa pjesa tjetër shumica janë për herë të parë.

E për këtë takim trajneri Bernard Challandes ka vendosur edhe për futbollistin që do ta mbajë shiritin e kapitenit.

Telegrafi merr vesh që mesfushori Herolind Shala do ta bartë shiritin e kapitenit, pasi konsiderohet si lider nga trajneri zviceran.

Për Shalën kjo është hera e dytë që bartë shiritin e kapitenit, pasi të njëjtën gjë e kishte bërë edhe në ndeshjen miqësore ndaj Danimarkës në Prishtinë.

27-vjeçari ka qenë njëri nga futbollistët më të preferuar nga trajneri Challandes, pasi sa herë ka qenë ai në fushë, Kosova nuk ka humbur asnjë takim.

Anëtari i Valerengas është rikthyer nga një lëndim që e mbajti jashtë fushave dhe tani është gati për t’i udhëhequr Dardanët drejt suksesit ndaj Suedisë.