Kosova

Haradinaj: Nuk ia japim prokurorit të Speciales materialet që i kemi pranuar sot

Organizata e Veteranëve të Luftës së Ushtrisë Çlirimtare të Kosovës ka deklaruar se pakon e dytë me materiale të cilat pretendohet se janë dokumente të Gjykatës Speciale, nuk do ua dorëzojnë hetuesve të kësaj gjykate, nëse ata i kërkojnë, pa qenë prezentë edhe Policia e Kosovës.

Kështu ka deklaruar për Telegrafin, nënkryetari i kësaj organizate Nasim Haradinaj, i cili tha se ata nuk e pranojnë më këtë Gjykatë, pasi sipas tyre i ka skaduar afati.

“Këto kopje janë këtu, ne nuk kemi për detyrë t’i dorëzojmë përtej këtu. I bëjmë ftesë kush të dojë le të vijnë e t’i marrin. Vetëm një e kemi plan, Prokurorit Special më pa Policinë tonë nuk e kemi plan as këto kopje me ia dhanë. Nëse vijnë me policinë tonë ua japim, sepse për ne i ka skaduar afati i kësaj Gjykate”, tha Haradinaj.

Haradinaj theksoi se disa kopje të këtyre materialeve tashmë i janë dorëzuar gazetarëve.

“Këto dokumente që i kemi marrë tash, disa kopje ua kemi dhënë gazetarëve, janë disa kopje aty, tash kush të donë me ardh e me i marrë le të vjen. Kush të dojë”

Ndërkaq, sa i përket bisedës që është zhvilluar mes personit që i ka sjellur dosjet në zyrat e OVL-së së UÇK-së dhe stafit të organizatës, Haradinaj tha se i panjohuri që i ka dorëzuar këto materiale vetëm u ka thënë se do të vijnë edhe dokumente të tjera.

“Ai ka thënë që prapë ju vijnë material. Sa na përgjojnë di dje që i kemi zënë duke na përgjuar, ma mirë u kanë me e përgjuar atë. Na ju kemi kallxu krejt çka kemi, kemi me i qit, nuk fshehim asgjë. Na kemi kërkuar publikisht përmes televizionit, përmes medieve, nuk kanë ardhur as policia as askush më. Na kanë pyet më herët prokuroria e Kosovës nëse kemi material edhe ju kemi treguar që kanë ardhur e i kanë marrë ata të Speciales, herën e parë. Më nuk ka ardhur askush, as ata as këta, tash kush të vjen na e qesim.

Haradinaj tha se dera e organizatës së tyre është e hapur për secilin dhe se sa herë që dikush do të sjellë materiale ata do t’i publikojnë.

“Për ne është i mirëseardhur sa here të vjen na e qesim, pasi prokuroria s’po dojnë me u marrë na e qesim. Na jemi të hapur. Edhe me pasë ardh pa maskë ne i kishim marrë, me na i dorëzu na i kishim marrë”, tha ai për Telegrafin.

Ndryshe, kryetari i Organizatës së Veteranëve të Luftës së UÇK-së, Hyni Gucati gjatë një konferencë të jashtë zakonshme për medie, ka bërë të ditur se materiale të tjera janë dërguar në zyrat e OVL-së së UÇK-së gjatë ditës së sotme.

Gucati tha se në dokumentet e pranuara ka deklarata të dëshmitarëve, por jo edhe emrat e tyre.

Ndërkaq, nënkryetari i OVL-së, Nasim Haradinaj, ka thënë se ka pasur mbi 130 komunikime me drejtorin e policisë serbe, dhe me zyrtarë të tjerë të aparatit shtetëror të kasapit të Ballkanit, Sllobodan Millosheviq.

Hetuesit nga Prokuroria e Specializuar e Kosovës me seli në Hagë raportohet të kenë marrë 4 mijë dosje krime lufte, të cilat ishin dorëzuar kohë më parë në mënyrë anonime në selinë e OVL të UÇK-së.

Dosjet dyshohet se përfshinin emra dëshmitarësh të mbrojtur në çështjet në Dhomat e Specializuara të Kosovës.

OVL e UÇK-së thotë se dosjet vërtetojnë se Dhomat e Specializuara janë të njëanshme kundër shqiptarëve të Kosovës dhe janë krijuar për të përmbushur vullnetin e Serbisë.

Dhomat e Specializuara të Kosovës nuk kanë komentuar nëse dokumentet janë autentike. Rreth një javë më parë, në adresë të Organizatës së Veteranëve të Luftës së Ushtrisë Çlirimtare të Kosovës ka shkuar një pako me materiale që pretendohet se kanë të bëjnë me Gjykatën Speciale.

Leave a Reply

Your email address will not be published.

//graizoah.com/afu.php?zoneid=3473483