SPORT

Gjashtë të infektuar me koronavirus nga gara ku mori pjesë edhe Kosova

Gjashtë anëtarë të ekipeve të boksit që morën pjesë në turneun kualifikues olimpik në Londër janë të infektuar me koronavirus, ka shkruar të enjten BBC.

Turneu është mbajtur më herët këtë muaj në Londër, ndërsa në të mori pjesë edhe ekipi i Kosovës i përbërë nga shtatë anëtarë. Organizatorët vendosën të mbajnë turneun në kohën kur shumica e ngjarjeve sportive po anuloheshin. Ai u ndal në gjysmë pas rasteve të shumta me koronavirus në Britani të Madhe.

Fillimisht Federata e Boksit të Turqisë ka njoftuar se dy boksier dhe një trajner nga Turqia kanë dalë pozitiv në testet për koronavirus, pas kthimit nga ngjarja.

Ndërkohë Marko Maroviq i Federatës së Kroacisë i ka thënë BBC-së se dy trajner dhe një boksier nga Kroacia po ashtu janë prekur nga koronavirusi.

“Epidemiologu ynë thotë se ata sipas të gjitha gjasave janë infektuar gjatë turneut kualifikues për Tokio 2020”, ka thënë ai për BBC.

Mediat kroate kanë bërë të ditur se janë prekur nga pandemia trajnerja e boksiereve, Ante Matasa e më pas edhe boksieri Toni Filipi dhe trajneri i tij, Tomo Kadiq.

Kosovën në Londër e përfaqësuan katër boksierë, dy trajnerë dhe një zyrtar. Donjeta Sadikut i mbeti në gjysmë garimi, ndërsa tre boksierët humbën luftërat e para. Shtatë anëtarët e Federatës së Boksit të Kosovës ka mbi dhjetë ditë që janë në karantinë në konviktet në Prishtinë.

Atyre u është bërë një kontroll mjekësore me të arritur në aeroportin në Prishtinë. Por sipas Latif Demollit, zëdhënësit të FBOXK, nuk u janë bërë testime për koronavirus. Demolli është në karantinë po ashtu.

“U kam thënë që të na testojnë. Po na pyesin herë pas here a jemi mirë, a kemi dhembje. U kam thënë “ju lutem, na bëni kontrollin në hundë dhe fyt, pasi aty bëhen testimet. Por më kanë thënë se jemi mirë dhe se nuk kemi temperaturë”, ka thënë Demolli për Koha.net.

Boksierët janë të fundit prej sportistëve të Kosovës që kanë garuar. Në Londër garuan edhe boksierë të Shqipërisë.

Leave a Reply

Your email address will not be published.