Tymi la të lënduar katër persona, e dhjetëra të tjerë u larguan nga ndërtesa. Të parët, dy nga ta zyrtarë policorë, u trajtuan për telashe me frymëmarrjen. E të dytët dolën për shkaqe sigurie, e që të qëndrojnë larg objektit në rrugën “Hajrullah Zymi” të Fushë Kosovës u sigurua policia.

Dëshmitarët prapa kamerës i thanë Klan Kosovës se pronarja pas rastit u kishte thënë se dyshon që shkaktar i zjarrit ishte rrobalarësja. Siç bëjnë të ditur këta, gruaja ishte larguar nga shtëpia rreth mesditës dhe kur ishte kthyer kishte gjetur zjarr. Gjithçka kishte ndodhur derisa brenda nuk ishte askush.

“Kanë hy tek banesa në katin e pestë dhe kanë pa se është krijuar temperaturë shumë e madhe nga zjarri për shkak se aty ishin ndezur një numër i madh i kauqeve dhe sfungjereve, nuk po e dimë a është normal e mobiluar apo ka pas diçka shtesë”, deklaroi Mal Gashi, Komandant i Brigadës së Zjarrfikësve, Prishtinë.

Ky bëri me dije se nga objekti u evakuuan edhe tre banorë të tjerë një kat më lartë që nuk kishin mundur të largohen për shkak të tymit e nxehtësisë. Kurse policia tashmë po e heton ngjarjen për t’i zbardhur shkaktarët e tij.