Kosova

Edhe PSD reagon për sulmin ndaj gazetarit Duriqi

Edhe Partia Socialdemokrate ka reaguar ndaj sulmit të gazetarit Visar Duriqi.

Nga kjo parti kanë thënë se ky sulm duhet zbuluar dhe ndëshkuar.

“Sulmi fizik ndaj gazetarit Visar Duriqi duhet zbuluar dhe ndëshkuar me prioritet. Raste të tilla na kujtojnë se mendimi ndryshe dhe fjala e lirë është në shënjestër, kurdo që prekin probleme të shtresëzuara dhe interesa biznesore dhe të pushtetit”, është thënë nga PSD.

Njoftimi i plotë:

Sulmi fizik ndaj gazetarit Visar Duriqi duhet zbuluar dhe ndëshkuar me prioritet. Raste të tilla na kujtojnë se mendimi ndryshe dhe fjala e lirë është në shënjestër, kurdo që prekin probleme të shtresëzuara dhe interesa biznesore dhe të pushtetit.

Nuk guxojmë të sillemi indiferent ndaj sulmeve të tilla, sado të izoluara që mund të ngjajnë. Sa herë që cënohet fjala e lirë, çështja merr përmasa politike dhe duhet trajtuar si e tillë. Dhe sa herë që këto raste mbesin të pa zbuluara inkurajojnë një sjellje të disiplinuar të gazetarëve përballë pushtetit dhe si rregull, përsëritjen e tyre në rast të padëgjueshmërisë eventuale.

Në anën tjetër, para se këto çështje të jenë punë hetimore dhe policore, ato janë çështje rezistence ndaj autoritarizmit dhe populizmit që i japin krahë të fortit dhe lënë të zhveshur qytetarët e gazetarët nga të drejtat e tyre.