Vetëm disa ditë pas Javës së Modës në Milano, Donatella Versace po bëhet lajm jo për koleksionin e saj – megjithëse i mirëpritur – pranverë-verë 2024, por për qëndrimin e saj ndaj politikave anti-LGBTQ+ të qeverisë italiane.

Në një fjalim plot pasion në një ceremoni çmimesh në Milano, stilistja denoncoi koalicionin e kryeministres së ekstremit të djathtë Giorgia Meloni për masat e vazhdueshme për të kufizuar të drejtat e LGBTQ+, duke përfshirë një shtrëngim ndaj prindërve të të njëjtit seks.

Versace, drejtoresha krijuese e labelit të saj me po këtë emër, mori duartrokitje të vazhdueshme për komentet teksa pranoi një çmim për barazi dhe përfshirje në CNMI Sustainable Fashion Awards.

“Këtu në Itali, nuk ka qenë kurrë më e rëndësishme për ne që të mbrojmë zërat e pakicave. Qeveria jonë është e vendosur të heqë të drejtat e individëve për të jetuar ashtu siç dëshirojnë”, tha Versace.

“Liria për të ecur në rrugë me kokën lart dhe pa frikë, cilido qoftë identiteti juaj. Liria për të krijuar një familje dhe për të jetuar ashtu siç duam. Liria për të dashur atë që duam. Të gjithë e kemi për detyrë të luftojmë për lirinë tonë”, potencoi ajo.