Kosova

Demiri: Nuk e kushtëzojmë Kurtin me ministri, por kemi dy kërkesa ndaj tij

Ministri në detyrë i Zhvillimit Rajonal, Rasim Demiri, i cili është edhe kryetar i koalicionit VAKAT, ka deklaruar se nuk do ta kushtëzojnë qeverinë e re me votë për të marrë ministri por që do të kërkojnë nga Albin Kurti heqjen e taksës ndaj produkteve boshnjake. Demiri i cili është edhe deputeti më i votuar nga komunitetet jo serbe, deklaratën e kryetarit të Partisë Liberale Egjiptiane se nuk do ta votojnë qeverinë Kurti nëse nuk u jepet një ministri e ka quajtur dëshirë personale.

Vendimi i PZAP-it për anulimin e mbi 3 mijë votave të ardhura nga Serbia do t’ia mundësojë Nismës së Fatmir Limajt kapërcimin e pragut, ndërkohë dy partive që synojnë ta bëjnë pushtetin ua ka prishur matematikat për koalicion e ndarje të pushtetit. Si pasojë, Lëvizja Vetëvendosje nga 32 deputetë sa kishte nga rezultatet përfundimtare të shpallura nga KQZ-ja, do të mbetet me 29 dhe LDK-ja do të humbë gjithashtu një.

Si pasojë këto dy parti nuk do të mund ta krijojnë qeverinë, duke qenë se së bashku kanë vetëm 57 vota. Nga një deputet do ta humbin edhe dy partitë tjera opozitare, PDK dhe AAK, ndërkohë koalicioni NISMA-AKR në Kuvend do të zë 6 ulëse, dhe me shumë gjasë do të përfshihet edhe në qeverinë e re që pritet ta krijojnë Albin Kurti e Vjosa Osmani.

Komunitetet jo serbe në Kuvendin e Kosovës do të përfaqësohen nga 10 deputetë. Kryetari i Partisë Liberale Egjiptiane, Veton Berisha i cili është zgjedhur deputet ka deklaruar se do të kërkojnë nga Albin Kurti një ministri për këtë komunitet përndryshe nuk do ta votojnë qeverinë e tij. Kuptohet, e gjithë kjo nëse vendimi i PZAP-së mbetet në fuqi.

Rasim Demiri ministër në detyrë i Zhvillimit Rajonal dhe kryetar i koalicionit VAKAT ka thënë për Gazetën Express se edhe pse kanë dalë si partia më e votuar nga komunitetet jo serbe nuk kanë asnjë kusht ndaj Albin Kurtit për të votuar qeverinë e re.

“Sipas kushtetutës komuniteteve jo serbe i takon një ministri, përvoja ka qenë që partia që fiton më së shumti vota ka marrë edhe një ministri. Ne po presim thirrje për takim prej mandatarit për Kryeministër, por nuk e kemi asnjë kusht. Do të bisedojmë me zotëri Kurtin dhe LDK-në dhe do të jemi pjesë e qeverisë së re”, ka thënë Demiri.

Demiri tutje është shprehur se kërkesën për të pasur një ministri komuniteti egjiptian, deputeti Veton Berisha e ka përmendur edhe në takimin që kanë pasur komunitetet me të dërguarin e Departamentit të Shtetit Matthew Palmer.

“Ne komunitete jo serbe kemi pasur një takim me Matthew Palmerin dhe kryetari i Partisë Liberale Egjiptiane e ka përmendur në takim kërkesën për një ministri për komunitetin e tyre, por dëshirat janë diçka tjetër dhe ligji është diçka tjetër. Në kushtetutë nuk është e garantuar që ministria t’i takojë komunitetit egjiptian, nuk është pushteti vetëm me pasë ministri, komuniteti egjiptian ka qenë në qeveri dhe kanë pasur poste të zëvendësministrave”, është shprehur Demiri.

Ai ka thënë se Kurtit do t’i kërkojnë që të formohet komuna e re e Reqanit, dhe të hiqet taksa ndaj Bosnje dhe Hercegovinës.

“Ne do të kemi kushte për komunitetin boshnjak, p.sh formimi i komunës së Reqanit. Po ashtu do të kërkojmë nga mandatari për tërheqjen e taksës ndaj Bosnjës. Kemi biseduar me zoti Kurtin dhe ai ka vullnetin dhe është pajtuar që Bosnja dhe Hercegovina është viktimë në këtë rast”, ka thënë Demiri.

I pyetur nëse Kryetari i VV-së është pajtuar që ta heq taksën ndaj Bosnje dhe Hercegovinës pa e zëvendësuar me reciprocitet, Demiri ka thënë se në takim me të kreu i VV-së nuk e ka përmendur reciprocitetin ndaj produkteve të Bosnje dhe Hercegovinës.

“Nuk e di programin qeverisës të Kurtit, ai është deklaruar që ndaj Serbisë do të ketë reciprocitet kurse në takim me mua nuk e ka përmendur reciprocitetin ndaj Bosnjës por vetëm është pajtuar se Bosnja është viktimë në rastin e taksës”, është përgjigjur kryetari i VAKAT.

Tutje ai ka thënë se po presin certifikimin e zgjedhjeve dhe beson se do të jenë pjesë e qeverisë së re.

“Kur të certifikohen zgjedhjet presim të kemi takim me Albin Kurtin dhe besojmë që do të jemi në koalicion dhe në qeveri”, ka thënë Demiri. 

Leave a Reply

Your email address will not be published.