Hi Tech

Cambridge Analytica mbyllet pas skandalit me të dhëna

Cambridge Analytica, firmë konsulentë me seli në Britani, tha se do të mbyllet, pas akuzave se ka keqpërdorur të dhënat e miliona përdoruesve në Facebook, për të ndikuar zgjedhjet presidenciale në ShBA, më 2016.

“Kemi vendosur se nuk është më e dobishme të vazhdojmë biznesin”, tha kompania, duke shtuar se, së shpejti, do të nisë procedurat e falimentimit në ShBA dhe Britani.

Cambridge Analytica, kompani e angazhuar nga fushata zgjedhore e presidentit të tanishëm amerikan, Donald Trump, është bërë objektiv i hetimeve, pasi një ish-punonjës i saj ka zbuluar se ajo ka pasur qasje të paligjshme në të dhënat e miliona përdoruesve në Facebook dhe se i ka përdorur ato për të ndikuar votuesit në ShBA.

Cambridge Analytica e ka mohuar se i ka shfrytëzuar këto të dhëna për të ndihmuar fitoren e Trumpit.