EKONOMI

Bëhet thirrje për përkrahjen e prodhimeve vendore e të mos anashkalohen në blerjet publike

Klubi i Prodhuesve të Kosovës ka bërë thirrje që në asnjë mënyrë të mos harrohen prodhuesit vendorë, në këtë kohë krize e pasigurie ekonomike – përcjell Kosova.info

Nëpërmjet një reagimi zyrtarë, ky klub, u ka bërë thirrje institucioneve qendrore e lokale, që të mos anashkalohen prodhuesit vendorë:

Në këtë kohë krize të krijuar nga pandemia e shkaktuar nga virusi COVID-19, Klubi i Prodhuesve të Kosovës, ju bën thirrje të gjitha institucioneve si atyre lokale dhe qendrore të Republikës së Kosovës që të përkrahin prodhimet vendore në të gjitha blerjet publike.

Klubi i Prodhuesve në vazhdimësi ka bërë thirrje që institucionet e Republikës së Kosovës duhet t’i japin përparësi prodhimeve vendore gjatë prokurimit publik, kur dihet që kjo praktikë zbatohet në shumicën e vendeve të regjionit dhe në vendet e BE-së. Me gjithë sakrificat, prodhuesit kosovar po vazhdojnë prodhimin përkundër humbjeve të cilat po përballen, ata po ashtu kanë shprehur gatishmërinë që të punojnë vetëm për kauzën e përbashkët të mbrojtjes së prodhimeve vendore. Prandaj, Klubi i Prodhuesve ju bënë thirrje të gjithëve që të përkrahin prodhimin vendor, pasi që prodhimit vendor sot më shumë se kurrë i nevojitet përkrahja jonë./Kosova.info/