Kosova

Arrestohet ish-luftëtari i ISIS-it Fitim Lladrovci

Ish i dënuari kohë më parë për pjesëmarrje në grupin terrorist ISIS në Siri, Fitim Lladrovci, është arrestuar të mërkurën nga Policia e Kosovës.

Lajmin e ka bërë të ditur Daut Hoxha, zëdhënës i policisë së Kosovës. Ai ka thënë se i arrestuari është dërguar në mbajtje për 48 orë.

“Ju konfirmoj se, me datën 24.04.2019 është arrestuar personi F. Ll, dhe i njëjti me urdhër të prokurorit të prokurorisë special është dërguar në mbajtje për 48 orë. Rasti është duke u trajtuar në bazë të nenit 134 të KPK”, ka thënë Hoxha për Koha.net.

Sipas Kodit Penal të Kosovës, neni 134 parasheh dënimet për bashkim për veprimtari kundër kushtetuese.

“Neni 134

Bashkimi për veprimtari kundër kushtetuese 1. Kushdo që formon një grup apo ndonjë bashkim tjetër të personave për kryerjen e veprave penale nga nenet 121-134 të këtij Kodi, dënohet me dënimin e paraparë për atë vepër penale. 2. Kushdo që merr pjesë apo bëhet anëtar i grupit apo bashkimit nga paragrafi 1. i këtij neni, dënohet me burgim prej një (1) deri në pesë (5) vjet. 3. Anëtari i grupit apo bashkimit, që e lajmëron grupin para kryerjes së veprës penale nga paragrafi 1. i këtij neni, dënohet me burgim deri në tre (3) vjet ose mund të lirohet nga dënimi”, thuhet në këtë nen.