Rajoni

AIPAC fton Vuçiqin si folës, Twitteri vërshohet me kritika për “mohuesin e gjenocidit”

“Ky njeri, me plot kuptimin e fjalës, është mohues gjenocidi”.

Kështu shkruan një komentues me emrin @mikeyfranklin pas postimit në Twitter të Komitetit Amerikano-Izraelit për Marrëdhëniet me Publikun (AIPAC), ku njoftohet se në konferencën e sivjetme që do të mbahet nga 1 deri më 3 mars në Uashington DC, si folës do të jetë edhe presidenti i Serbisë, Alleksandar Vuçiq.

Image

Jasmin Mujanoviq, një analist nga Bosnja e Hercegovina, ka ironizuar me vendimin për të ftuar Vuçiqin në këtë konferencë, duke thënë në Twitter: “Interesante. Supozoj se temë e fjalimit të tij do të jetë ‘Gjenocidi në Bosnjë dhe Krimet Kundër Njerëzimit në Kosovë dhe Pse i Mohoj Ato’”.

Edhe komentues tjerë në Twitter kanë kritikuar vendimin e AIPAC-ut për të ftuar Vuçiqin si folës në këtë konferencë, duke ua kujtuar se Vuçiqi ka qenë ministër i Informacionit gjatë kohës së Sllobodan Millosheviqit kur edhe u zhvilluar luftërat në Bosnje e Kosovë.

“Vuçiqi shërbeu si ministër i Informacionit i Sllobodan Millosheviqit gjatë Luftës në Bosnjë në të ’90-at dhe ka mohuar vazhdimisht se masakrat serbe ndaj myslimanëve të Bosnjës gjatë asaj lufte ishin gjenocid”, ka shkruar @nycsouthpaw.

Lexoni KËTU reagimet e përdoruesve të rrjetit social Twitter pas vendimit të AIPAC-ut.

Pak më parë, në profilin zyrtar të AIPAC-ut u konfirmua se Vuçiqi do të jetë një prej folësve në këtë konferencë.

Ndërkaq, pretendenti kryesor i demokratëve për president në zgjedhjet në SHBA më 2020, senatori Bernie Sanders, ditë më parë njoftoi se nuk do të marrë pjesë në konferencën vjetore të lobistëve pro-izraelitë AIPAC pasi shfaqi brengën e tij rreth gatishmërisë së grupit për të përqafuar qëndrimet e fanatikëve dhe për shkak të shpërfilljes së të drejtave të njeriut të palestinezëve.

Edhe senatorja Elizabeth Warren (Demokrate), po ashtu kandidate për presidente, më 6 shkurt njoftoi se nuk do të marrë pjesë në konferencën e AIPAC-ut.