KULTURË

Aktorët në prag të shfaqjes, Teatri Kombëtar pa ngrohje

Pak orë para premierës së shfaqjes “Kthimi i Karl Majit”, dramaturgu Jeton Neziraj nëpërmjet rrjeteve sociale, ka alarmuar se aktorët po bëjnë përgatitjet e fundit pa ngrohje, pavarësisht se sivjet Teatri Kombëtar i Kosovës është kyçur në sistemin e ngrohjes së qytetit në Prishtinë.

“Sivjet Teatri Kombëtar është kyç në sistemin e ngrohjes së qytetit – megjithatë si krejt punët te ne – në Teatër as sot nuk ka ngrohje! E kemi premierë! U mërdhimë – por s’ka dert, se kemi shtet që na ngroh- me patriotizëm e asfalt, natyrisht!”, ka shkruar Neziraj në “Facebook”.

Premiera e shfaqjes “Kthimi i Karl Majit” do të jepet sonte nga ora 20:00 në Teatrin Kombëtar të Kosovës. Shfaqja me autor Jeton Neziraj dhe regji të Blerta Rrustemit, ka në role kryesore aktorët Arta Muçaj, Adrian Morina, Armend Smajli, Ylber Bardhi, Shpëtim Selmani.

“Termokosi” ka nisur të enjten sezonin e ri të ngrohjes në kryeqytet, por ende disa lagje janë duke u ankuar për mungesë të ngrohjes.