OPINION

Kosova parajsë e pushtetarëve, ferr i qytetarëve!

Shkruan: Florim ZEQA

Kosova e pas-pavarësisë është shndërruar në një tabelë shahu, ku ndërkombëtarët luajnë lojën më një palë figura të zeza politike (qeveritarët), ndërsa në anën tjetër duke e lënë të pa fuqishëm, në PAT-pozicion popullatën shumicë të Kosovës (shqiptarët) më figura të bardha.

Ndërkombëtarët i kanë shndërruar pothuajse të gjithë liderët vendor në figura politike, të cilët me lehtësi i lëvizin para-prapa dhe anasjelltas. 

Sa herë që ju duhen “rokadat” i shfrytëzojnë zgjedhjet si mekanizëm justifikues para opinionit publik për arritjen e qëllimeve të tyre afatgjata mbi Kosovë.

Opinioni publik vendor është mësuar të shohë korin diplomatik ndërkombëtar (ambasadat e huaja) në Kuvendin e Republikës së Kosovës sa herë që merren vendime në kundërshtim më vullnetin e qytetarëve si bie fjala; rezoluta për fillimin e bisedimeve më Serbinë, shitjen e KEK-ut, ratifikimin e marrëveshjes së 19 prillit 2013-të (që prodhoj Asociacionin e komunave serbe), votimin e Gjykatës Speciale, votimin e Demarkacionit me Malin e Zi, etj.

Delet e ngujuara, barinjtë e uritur

Kosova e sotme, më tepër i ngjason një burgu kolektiv se sa një shteti të pavarur, më tepër i ngjason një qeverisje lokale se sa një shteti sovran, Kuvendi i ngjason një koloseumi, populli një kopeje delesh të ngujuara, ndërsa politikanët u ngjajnë barinjve të uritur!

Zot shtëpie, dihet, janë bërë ndërkombëtarët, të gjithëpushtetshmit dhe gjithëfuqishmit e kohës sonë!

Timonin e kontrollit të plotë mbi qeveritarët kosovarë e mbajnë ambasadorët e shteteve perëndimore në Prishtinë!

Qeveritarët në Kosovën e pasluftës e sidomos të kësaj periudhës së pas-pavarësisë, varfanjakët e djeshëm, supermenët dhe milionerët e sotëm janë shndërruar në “supermen” dhe zbatues të skemave politike të të tjerëve në dëm të interesave të shtetit të Kosovës në veçanti dhe popullit shqiptar në përgjithësi.

Qytetarët nuk është se kanë pritur që 20 vjet pas lufte të hanë me lugën e artë, por kanë pritur që familjet e tyre t’i ushqejnë më djersën e tyre në Kosovë, e jo të bredhin rrugëve e metropoleve të botës në kërkim të ekzistencës për familjet e tyre!

Askush nuk ka pritur që pas gjithë atij gjenocidi, pas gjithë atyre masakrave serbe anë e kënd Kosovës, t’i kemi prapë pas dere ata që na vranë e prenë pamëshirshëm përgjatë një shekulli! 

Sikurse nuk e kemi pritur në asnjë rrethanë që udhëheqësi politik i krahut të luftës të negocioj lirinë e fituar më gjak, duke shkelur mbi gjakun e dëshmorëve dhe martirëve, duke shkelur mbi eshtrat e të pagjeturve, mbi idealet e shenjta, siç janë; liria, pavarësia e vendit dhe ideja kulmore e bashkimin e trojeve etnike.

Si pasojë e keqqeverisjes, mungesës së zhvillimit ekonomik dhe krizave të njëpasnjëshme politike, shteti është duke shkuar drejt falimentimit.

Përveç krizës së thellë politike, në të cilën është katandisur vendi, shtetin e Kosovës e kanë mbërthyer edhe kriza financiare dhe morale njëkohësisht,…të gjitha së bashku janë pasojë e keqqeverisje dhe mungesës së zhvillimit ekonomik për një kohë të gjatë.

Shteti i varfër, politikanët e pasur

Si pasojë e mos zhvillimit ekonomik, në shtetin e varfër të politikanëve të pasur, burimi i vetëm i mbushjes së arkës shtetërore janë të “vjelat” nëpër dogana, gjobat në komunikacion dhe tatimpaguesit e bizneseve të vogla.

E them kështu për faktin e thjeshtë se korporatat e biznesmenëve të mëdhenj, përveçse e fusin mallin e padoganuar në Kosovë, në të shumtën e rasteve u ikin edhe obligimeve që kanë ndaj shtetit përmes formave të ndryshme të korruptimit të zyrtarëve shtetërorë dhe lidhjeve të fuqishme me bosët e politikës.

Në anën tjetër, gjysma e popullatës kosovare jeton në varfëri (16 % në varfëri të skajshme), familjarët e qeveritarëve, supermenëve të këtij populli të varfër bëjnë jetë luksoze që i kalon nivelet e shteteve të perëndimit duke gëzuar të gjitha privilegjet; shkollim cilësor , shërim, punësim, rekreacion (pushime në vendet më të bukura në botë),…këtë ua mundësojnë pagat mujore prej disa mijëra euro dhe të ardhura enorme nga aferat korruptive!

Si vërtetim i kësaj shikojini vilat dhe shtëpizat luksoze të disa prej politikanëve të pasluftës,…nga kasollet kanë kaluar në vila luksoze më vlera milionëshe, makinat e blinduara e deri të bizneset e tyre (të pista) anë e kënd vendit.

Mirëpo fatkeqësisht ende një pjesë e popullatës nuk është këndellur, dhe prapë vazhdojnë të vrapojnë pas të korruptuarve, banditëve, kriminelëve në kërkim të një lëmoshe të pavlerë që nuk ua ndryshon jetën në asnjë rrethanë!

Përderisa të vazhdoj pasurimi i paligjshëm i supermenëve vendor, për aq do të vazhdoj varfërimi i popullatës dhe zbrazja në heshtje e Kosovës nga shqiptarët.

Ndërkombëtarët, sundimtarët faktik të Kosovës

Për aq sa janë fajtorë pushtetarët vendor, janë fajtor edhe ndërkombëtarët, të gjithëpushtetshmit dhe gjithëfuqishmit e kohës nëpër të cilën po kalojmë,…të cilët përveç fuqisë politike e kanë edhe atë ekonomike dhe ushtarake të instaluar në vendin tonë!

Prandaj, ndërkombëtarët ashtu siç i ndërrojnë figurat e korruptuara dhe inkriminuara në pushtet, me lehtësi do t’i jepnin kahe pozitive zhvillimeve politike në vendin tonë.

Ndërkombëtarët, sunduesit faktik të Kosovës, brenda pak ditësh, për të mos thënë javësh e muajsh e kanë mundësinë e pastrimit të skenës politike nga të korruptuarit dhe inkriminuarit, ndërsa brenda një viti mund ta bëjnë Kosovën vend me perspektivë të qartë zhvillimore.

Prandaj, pas 20 viteve të monitorimit dhe mbisundimit të fuqishëm ndërkombëtar, ka ardhur koha e qartësimit të prezencës ndërkombëtare në Kosovë! 

Janë këtu për t’na ndihmuar ne në konsolidimin e shtetit apo për ta ndihmuar pakicën serbe në zhbërjen e shtetit tonë!?

Mbajtja dhe mbështetja e “barinjve” dhe gjysmanalfabetëve, servilëve dhe hajdutëve në pushtet nga ana e ndërkombëtarëve, i lë të hapura mëdyshjet për qëllimet e tyre të pasinqerta ndaj Kosovës dhe popullit të saj.

Mungesa e dashurisë për shtetin dhe qytetarët

Klasës politike kosovare i mungon dashuria ndaj atdheut dhe popullit të vet. Politikanët e katapultuar në majat e pushtetit, në vend që të punojnë ditë e natë për mirëqënien e popullit, kujdesën si të përvetësojnë e gjithë pasurinë shoqërore si dhe duke zhvatur buxhetin e shtetit. 

Pjesa tjetër e politikës (opozita) për të ardhur deri të gjahu (pushteti) janë të gatshëm të shkatërrojnë çdo gjë që u del përpara!

Të gjithë së bashku, pushtetarë dhe opozitarë me veprimet e tyre destruktive janë duke e dërguar shtetin e ri të Kosovës drejt shkatërrimit dhe falimentimit total.

Politikanëve të uritur, sundimtarëve vendor, “Sheikëve” që u shndërruan në multimilionerë karshi një popullate të varfër, më së miri u shkojnë për shtati këta rreshta të këngës “Amaneti i Clownit”, të Rock grupit TROJA, po citoj; “Kush janë këta njerëz që s’janë shkollua, nuk kan mësue që njeriu nuk ban shpinë e vet me vjedhë,…janë këta njerëz që diellin ma kan nal,…janë këto vjet që kurr nuk muj me i fal”, e deri të vargu “Janë këta njerëz që vet nuk muj me i nal”, që thërrasin si kushtrim për nevojën e unifikimit e të gjitha forcave progresive për largimin përfundimtar nga pushteti dhe skena politike e vendit, të kësaj klase të shëmtuar kusarësh politikë.